Паглядзела на жанчыну-вахцёрку — і мяне перасмыкнула

Пра незвычайныя камбэкі на бацькоўскім сходзе ў беларускай школе.

Прыйшла ў школу да сына на бацькоўскі сход перад пачаткам новага навучальнага года. Звычайна сюды так проста не трапіш: пры ўваходзе стаіць турнікет. Вучні праходзяць строга па вучнёўскіх білетах. У дні бацькоўскіх сходаў прайсці можна, але неабходна ўпісваць прозвішча і распісацца ў журнале ў вахцёра.

На гэты раз дазволілі прайсці і не адзначацца. Я здзівілася. Паглядзела на жанчыну-вахцёрку… і… мяне перасмыкнула. На ёй была форма, вельмі падобная да міліцэйскай. Падчас папярэдніх наведванняў школы я такой формы на вахцёрах не заўважала.

Справа ў тым, што людзі ў форме пераследуюць мяне ўжо даўно. Напачатку гэта былі супрацоўнікі з шматлікіх кабінетаў усім вядомага будынка на праспекце Незалежнасці ў Мінску.

Пасля доўгіх допытаў яны накіравалі мяне да сваіх калег у форме ў «амерыканку».

Людзі ў форме з «амерыканкі» перавезлі мяне ў СІЗА на Валадарцы зноў жа да людзей у форме, але ўжо іншага «рангу».

Потым былі людзі ў форме з канвою, які суправаджаў мяне ў суд, прычым неаднаразова. Менавіта гэтыя людзі ў форме казалі мне, што будуць страляць на паражэнне ў выпадку ўцёкаў.

Абвінавачвалі і судзілі мяне таксама людзі ў форме, да таго ж гэта былі жанчыны.

Наступныя людзі ў форме перавозілі мяне ў «сталыпінскім вагоне» ў калонію, з-за іх я ледзь не задыхнулася.

У калоніі мяне зноў сустрэлі людзі ў форме, павесілі на мяне жоўтую бірку, прымушалі прызнаць віну і ўсяляк перавыхоўвалі.

Пасля поўнасцю адбытога тэрміну людзі ў форме нават не думалі пакідаць мяне ў спакоі. На працягу працяглага перыяду «на волі» штотыдзень я мусіла прыходзіць да людзей у форме, каб быць прафілактычна ўлічанай, удзельнічаць у грамадска-карысных работах, пагашаць судзімасць.

Пры гэтым у перапынках паміж сустрэчамі ў крымінальна-выканаўчай інспекцыі людзі ў форме пастаянна «наведвалі» мяне дома, часта яны рабілі гэта ноччу.

Але нават пасля пагашэння судзімасці ад людзей у форме не схаваешся, бо яны ўнеслі мяне ў «спіс экстрэмістаў» і могуць нагадаць пра сябе, калі ім заманецца. Патэлефанаваць у любы час, прыйсці дадому без папярэджання, правесці вобшук, не дазволіць выехаць за мяжу, выклікаць на «беседу» і гэтак далей.

І вось наступны камбэк. Класная кіраўніца сярод іншых арганізацыйных аб'яваў паведаміла, што на патрабаванне дырэктара ўсе бацькі павінны падпісаць паперу аб тым, што яны азнаёміліся з наваўвядзеннем у школе. Гаворка пра пастанову, якая робіць магчымым дагляд рэчаў навучэнцаў пры ўваходзе ў школу без прысутнасці бацькоў.

Як і большасць бацькоў, была ў курсе наваўвядзення. Абурацца чым бы там ні было на бацькоўскіх сходах у школе я не адважваюся: не хачу нашкодзіць сыну і баюся чарговай сустрэчы з людзьмі ў форме.

Некаторыя бацькі дэманстратыўна закочвалі вочы. Але выказацца супраць ніхто не адважыўся: усе без пярэчанняў падпісалі паперу.

Я ўявіла свайго сына, які ведае, як абазначыць свае межы, цяжка прачынаецца ранкамі і ўжо даўно называе школу «шарашкай». Ён прыходзіць у школу, людзі ў форме лезуць у ягоны заплечнік, рыюцца ў ягоных рэчах, фактычна ўрываюцца ў яго асабістую прастору.

Я ведаю, што такое дагляд. Ведаю, наколькі гэта прыніжальна. Голы шмон, які даводзілася праходзіць кожны раз пасля этапу з адной турмы ў другую, часта сніцца ноччу.

Што я павінна сказаць сыну? Не хвалюйся, будзь спакойны, не абурайся, проста пакажы, што ў цябе ў заплечніку. Інакш… можна апынуцца… у турме…

Але цяпер паміж школай і турмой амаль няма адрозненняў. І ў турме, і ў школе нас сустракаюць людзі ў форме і ладзяць шмон.

Дарэчы, на сходзе класная, між іншым, паведаміла бацькам: «Калі вы выязджаеце з дзіцем за мяжу, або дзіця выязджае ў суправаджэнні іншых дарослых, вы абавязаныя (!) паведаміць пра гэта дырэктару школы».

Падобна, што мы ўсе, і дарослыя, і дзеці, — зняволеныя. Мы ў турме.

Вера Влуч, «Салідарнасць»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]