Пад Мінскам запусцілі «табло ганьбы» для кіроўцаў
2- 17.04.2026, 20:11
- 1,014
Парушэнні выводзяцца на экран у рэальным часе.
На трасе Р53 «Слабада – Навасады» ў тэставым рэжыме запрацавала «разумная дарога». Найбольш прыкметны яе элемент — інфармацыйнае табло, якое ў рэальным часе выводзіць на экран нумар аўто і само парушэнне ПДР. Пра прынцып працы новай сістэмы распавёў начальнік ГУ ДАІ МУС Віктар Ротчанкоў.
Праект «Разумная дарога» рэалізуюць на ўчастку з 0-га па 27-ы кіламетр трасы Р53. Яго задача — павысіць бяспеку руху і аператыўна папярэджваць кіроўцаў пра небяспеку, адзначыў Ротчанкоў.
Сістэма счытвае рэгістрацыйны знак аўто, фіксуе парушэнне, а прыкладна праз пяць кіламетраў інфармацыя з’яўляецца на табло над дарогай. Паводле слоў начальніка ДАІ, на дадзены момант комплекс адсочвае 4 віды парушэнняў:
— перавышэнне хуткасці;
— адсутнасць тэхагляду;
— выкарыстанне тэлефона за стырном;
— непрыстагнуты рамень бяспекі.
На дадзены момант у рэальным рэжыме да адказнасці прыцягваюць за два парушэнні:
— перавышэнне хуткасці;
— адсутнасць тэхагляду.
Менавіта за іх беларускім кіроўцам ужо прыходзяць так званыя «лісты шчасця».
Яшчэ два віды парушэнняў — размова па тэлефоне за стырном і непрыстагнуты рамень — пакуль фіксуюць у тэставым рэжыме. Як патлумачыў Віктар Ротчанкоў, цяпер ідзе гаворка пра прафілактыку, а пра пераход да штрафаў паведамяць асобна.
Калі парушэнняў не выяўлена, экран не пустуе. На табло выводзяць дарожную інфармацыю: звесткі пра надвор’е, заторы і іншую абстаноўку на трасе.
Незвычайнае табло хутка разляцелася па сацсетках. Карыстальнікі адрэагавалі па-рознаму: адны ўбачылі ў гэтым карысную меру для дысцыпліны на дарозе, іншыя — занадта дэманстратыўны спосаб нагадваць пра парушэнні.
Сярод каментарыяў былі і жарты, і раздражненне:
«А з днём нараджэння віншаваць будуць?»
«А навошта парушаць? Не парушай — і не будуць выводзіць».
«Вялікі брат сочыць за табой...»
«Прачытаеш такое пасланне — і адразу ў бліжэйшы слуп ад засмучэння пачуццяў. Навошта псаваць людзям падарожжа? Раней жадалі «Шчаслівай дарогі!»»
«М-да. Табло ганьбы».
«Няпраўда. Добрая ідэя. Спадзяюся, па ўсёй краіне такія паставяць».
Судзячы па рэакцыі, для адных кіроўцаў сістэма выглядае як сучасны інструмент прафілактыкі, для іншых — як публічнае напамінанне пра правіну проста на дарозе.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
