Гурт Irdorath прадставіць альбом і кнігу, створаныя ў беларускай калоніі

Тур адбудзецца ў найбуйнейшых гарадах Польшчы, Германіі, Чэхіі.

Беларускі pagan-folk-гурт Irdorath вяртаецца з маштабнай аўдыё-літаратурна-мастацкай прэм'ерай: новы альбом і кніга Bestiarium — першая буйная праца гурта пасля палітычнага зняволення і аднаўлення творчай дзейнасці ў эміграцыі.

Альбом Bestiarium цалкам на беларускай мове і натхнёны вобразамі міфалогіі роднай краіны. Ён прысвечаны пошуку чалавечнасці ў нечалавечых істотах, якія паўстаюць як складаныя персанажы са сваімі характарамі і асаблівасцямі.

Двумоўная кніга (на беларускай і англійскай мовах) з'яўляецца паўнавартаснай мастацкай часткай праекта. Яна ўключае тэксты песень, ілюстрацыі, легенды, культурны кантэкст і каментары гурта, што дапамагае слухачам і чытачам адчуць персанажаў як герояў трагічных, іранічных і філасофскіх змрочных гісторый. Дзякуючы такому падыходу нават тыя, хто не размаўляе па-беларуску, змогуць заглыбіцца ў свет беларускай міфалогіі і культуры.

Значная частка музычнага і візуальнага матэрыялу была створана падчас палітычнага зняволення аўтараў, і, вядома, гэты досвед адбіўся ў альбоме. Завершаны ў эміграцыі і з абноўленым складам, Bestiarium атрымаў новае, насычанае і магутнае гучанне.

Рэліз ствараўся больш за пяць гадоў і ўключыў увесь назапашаны аўтарамі досвед. Такім чынам, ён сфармаваўся ў паўнавартасны аўдыявізуальна-літаратурны твор, накіраваны на папулярызацыю беларускай культуры, у тым ліку за межамі краіны.

Кніга будзе выпушчаная ў фізічным выглядзе разам з музычным кампакт-дыскам. Альбом таксама будзе прадстаўлены асобна ў фармаце класічнага дыджыпака з буклетам.

У падтрымку новага альбома гурт правядзе абмежаваную серыю спецыяльных выступаў, на якіх альбом будзе выкананы цалкам. Паколькі лідары гурта чакаюць дзіцяці гэтым летам, гэтыя шэсць канцэртаў стануць адзінымі жывымі выступамі Irdorath у гэтым годзе. Пасля прэзентацыйнага туру гурт прыпыніць канцэртную дзейнасць як мінімум да 2027 года.

Прэзентацыйныя канцэрты Bestiarium адбудуцца ў Варшаве, Познані, Кракаве і Берліне. На гэтых канцэртах гурт будзе падтрыманы польскім фолк-дуэтам Furda. Дадатковыя канцэрты адбудуцца ў Празе і Брне, дзе гурт Irdorath выступіць у якасці спецыяльнага госця чэшскага гурта Deloraine.

Геаграфія і даты туру:

24 красавіка — Варшава, Proxima

25 красавіка — Познань, 2 Progi

26 красавіка — Берлін, Maschinenhaus

28 красавіка — Прага, Archa Plus

30 красавіка — Брно, Sono Centrum

1 мая — Кракаў, Zaścianek

Квіткі можна набыць па спасылцы

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]