«Усё дарую»: як «злодзей» і «падонак» стаў для Лукашэнкі паважаным чалавекам

Азаронак прыкусіў язык.

«Чаму Лукашэнка пагарджае ўсякімі алігархамі і наўварышамі. Ды таму, што яны парушылі старажытную запаведзь. Той жа «Норнікель» — гэта прадукт і гора, і вялікай працы савецкага народа. І вось яго аддаюць алігарху, злодзею, падонку, які ладзіць вечарынкі з прастытуткамі на крэйсеры «Аўрора», каб паглуміцца з яго залпу і з усіх савецкіх працаўнікоў». Так пісаў дзяржаўны прапагандыст Грыгорый Азаронак у красавіку гэтага года.

Дарагія госці

У аўторак, 8 верасня, Аляксандр Лукашэнка шчыра прымаў таго, каго Азаронак называў алігархам, злодзеем і падонкам. То бок уладальніка «Норнікеля» Уладзіміра Патаніна. Нагадаў яму пра беларускія карані і сказаў, што вельмі рады бачыць яго ў Беларусі. І адразу пасля гэтага аказалася, што ён ужо і не такі падонак.

«Я сёння так пачытаў дзесьці ў пабліках, у інтэрнэце, а вось ну мы цудоўна ведаем слова, якое ўсюды заўсёды ў абароце — «алігарх». Адзін з прадстаўнікоў буйнага расійскага капіталу. Ну слухайце, куды дзявацца, як кажуць», — гаварыў Азаронак вечарам 8 верасня

Дзявацца сапраўды асабліва няма куды. А галоўнае — не хочацца. Бо напярэдадні Патанін падпісаў пагадненне аб стварэнні сумеснага прадпрыемства з заводам БелАЗ. На першапачатковым этапе прадугледжваецца, што СП, якое пабудуюць у Краснаярскім краі, будзе займацца рамонтам тэхнікі. У будучыні прадпрыемства плануе запусціць уласную вытворчасць. Магутнасць складзе 150 адзінак тэхнікі на год.

Гэта, насамрэч, вельмі амбіцыйныя планы. Бо штогадовая патрэба расійскіх горназдабыўных кампаній складае 170 адзінак. То бок, калі ўсё пойдзе паводле плану, гэтае СП закрые амаль 90 працэнтаў патрэбаў расійскай горназдабыўной галіны ў тэхніцы.

«Гэта дазваляе нам вырашыць пытанне не толькі насычэння горнай тэхнікай нашага прадпрыемства, але і сумеснае супрацоўніцтва дазволіць стварыць новую лінейку тэхнікі, якая, паводле нашых разлікаў і нашых надзей, будзе паспяхова канкурыраваць з найлепшымі ўзорамі», — сказаў Патанін.

БелАЗ не вывезе

Для БелАЗа гэта вельмі своечасовае пагадненне. Апошнім часам гігант беларускай прамысловасці ўжо не той, што раней. На галоўным для прадпрыемства расійскім рынку БелАЗ ціснуць кітайскія канкурэнты. Калі раней БелАЗ займаў 70–80 працэнтаў на расійскім рынку кар’ерных самазвалаў, то на пачатак 2026 года яго доля абвалілася да 45–50 працэнтаў.

Адначасова з стратай рынку ўпалі і даходы. Што, пагадзіцеся, лагічна. Чысты прыбытак холдынгу ў Расіі ў 2025 годзе абрынуўся амаль удвая і склаў 2,5 мільярда расійскіх рублёў. Мінпрам па выніках 2025 года афіцыйна прызнаў працу холдынгу незадавальняльнай.

Пры гэтым у завода — грандыёзныя планы. У гэтым годзе завод плануе накіраваць у асноўны капітал 300 мільёнаў рублёў. У паўтара раза больш, чым у 2025 годзе.

То-бок супрацоўніцтва з Патаніным, які б ён ні быў алігарх, для БелАЗа — можна сказаць, выратаванне. І гарантаваны збыт, і перспектыва фінансавых укладанняў. «Норнікель» — адна з нямногіх расійскіх кампаній, якая цяпер адчувае сябе добра. З-за росту коштаў на каштоўныя і каляровыя металы прыбытак кампаніі за паўгоддзе вырас больш як у два разы і склаў 2 мільярды долараў. То-бок грошы ёсць.

Сямейныя справы

А калі беларускія ўлады чуюць грошы, асабліва вялікія грошы, іх класавыя інстынкты адразу адключаюцца. Тым больш, што ў супрацоўніцтве БелАЗа з Патаніным у Аляксандра Лукашэнкі ёсць асабістая зацікаўленасць. Бо для Аляксандра Лукашэнкі БелАЗ — гэта не проста адзін з беларускіх прамысловых гігантаў.

БелАЗ — гэта не якое-небудзь там дзяржаўнае прадпрыемства. Ці, даруй, Божа, народнае. БелАЗ — гэта можна сказаць, сямейнае прадпрыемства. Ну, сам завод, вядома, дзяржаўны. А вось грошы, якія гэты завод зарабляе, — ужо не зусім.

Уся тэхніка завода ў Расіі прадаецца праз гандлёвы дом БелАЗ, заснавальнікам якога з'яўляецца прэзідэнцкі спартыўны клуб. Кіруе гэтым клубам сярэдні сын Лукашэнкі — Дзмітрый. Найбольш прыбытковымі дылерамі, праз якіх прадаецца тэхніка БелАЗа, валодаюць жонкі менеджараў Гандлёвага дома або блізкія сябры сям'і Дзмітрыя Лукашэнкі. Паводле ацэнкі Беларускага расследавальніцкага цэнтра, у 2017–2021 гадах даходы гэтых дылераў склалі 176 мільёнаў долараў.

А калі гаворка ідзе пра грошы сям'і, усе размовы пра класавы гонар адразу становяцца недарэчнымі. І алігарх ужо больш не алігарх, а паважаны партнёр. Якому можна дараваць нават паглумленне ў асабліва вычварнай форме над крэйсерам «Аўрора».

Аляксей Мазартаў, «Беларусы і рынак»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]