Пентагон расакрэціў новыя дакументы пра НЛА

У адным з іх фігуруе «лятаючая бульбіна».

Пентагон апублікаваў новую партыю расакрэчаных матэрыялаў пра НЛА. У адным з дакладаў апісваецца загадкавы аб’ект над штатам Каларада, які відавочцы параўналі з гіганцкай «лятаючай бульбінай», піша The New York Times.

Згодна з дакументамі, незвычайны аб’ект заўважылі ў лютым 2022 года над гарамі Шайен паблізу горада Каларада-Спрынгс. Яго назіралі афіцэр вайсковай разведкі і чацвёра вайскоўцаў ЗША.

Сведкі расказалі, што аб’ект быў памерам з буйны самалёт і нагадваў «вуглаватую, несіметрычную бульбіну», пакрытую няроўнымі панэлямі. Ён «нерухома вісеў на вышыні каля 90–150 метраў над горным хрыбтом, паступова змяняў форму і меў паўпразрысты белы адценак, які адлюстроўваў сонечнае святло». А праз некаторы час знік.

Пазней адзін з відавочцаў падрабязна апісаў убачанае супрацоўнікам ФБР, пасля чаго крыміналіст-мастак падрыхтаваў малюнак аб’екта, які сапраўды нагадваў велізарную бульбіну ў небе.

У дакладзе ФБР з’явіліся і новыя падрабязнасці інцыдэнту. Паводле паказанняў сведкі, аб’ект заўважылі каля 11:25 раніцы. Паводле яго слоў, ён складаўся з «элементаў няправільнай формы, што нагадвалі рыбіную луску або панэлі, якія не перакрывалі адна адну і размяшчаліся асіметрычна». Сам аб’ект заставаўся «цалкам нерухомым», аднак яго паверхня нібыта змянялася: асобныя панэлі «рухаліся павольнымі хвалямі, якія адначасова пачыналіся ў розных месцах».

У апублікаваных матэрыялах прыводзіцца і магчымае тлумачэнне таго, што адбылося. Паводле версіі спецыялістаў, аб’ект мог аказацца аптычнай ілюзіяй, выкліканай адбіццём сонечнага святла ад заснежаных схілаў і аблокаў. Аднак у заключэнні адзначалася, што гэтая версія мае «нізкую ступень упэўненасці».

Таксама сярод новых дакументаў ёсць паведамленне пра іншы інцыдэнт. У кастрычніку 2023 года шэсць федэральных агентаў заявілі, што на працягу двух дзён назіралі каля важнага аб’екта нацыянальнай бяспекі на захадзе ЗША «свяцячыяся шары, якія выпускалі іншыя шары». У Пентагоне не змаглі даць адназначнае тлумачэнне гэтаму з’явішчу.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]