Еўропа рыхтуе адказ на саміт Трампа з Пуціным і Сі Цзіньпінам
- 19.11.2026, 11:42
- 2,740
Фота: Reuters
Саюзнікі Украіны сустракаюцца сёння ў Берліне.
Еўрапейскія саюзнікі Украіны збяруцца сёння ў Берліне са спецпасланнікамі прэзідэнта ЗША Стывам Уіткофам і Джарэдам Кушнерам. Час сустрэчы выбралі так, каб аператыўна падрыхтаваць сумесны адказ на магчымыя заявы пасля перамоў Дональда Трампа у Кітаі.
Аб гэтым паведамляе Reuters.
У сустрэчы «кааліцыі ахвотных» возьмуць удзел лідары Германіі, Францыі, Вялікабрытаніі, Польшчы і Італіі, а таксама генеральны сакратар НАТА Марк Руттэ.
Паводле слоў нямецкіх чыноўнікаў, галоўнай тэмай стане пацвярджэнне абавязацельстваў па надзейных і юрыдычна абавязальных гарантыях бяспекі для Украіны. Яны павінны ўступіць у сілу пасля спынення агню.
Чаму сустрэчу праводзяць менавіта сёння
Праз некалькі гадзін да берлінскіх перамоў чакаецца сустрэча Трампа з лідарам Кітая Сі Цзіньпінам і расійскім дыктатарам Уладзімірам Пуціным. Сярод тэм абмеркавання можа быць Украіна.
Саміт у Шэньчжэне ўзмацніў занепакоенасць еўрапейскіх дзяржаў, што рашэнні аб вайне і будучыні кантынента могуць прыняць без іх удзелу.
Нямецкія чыноўнікі патлумачылі, што час сустрэчы ў Берліне выбралі так, каб саюзнікі Украіны маглі хутка ўзгадніць адказ на любыя аб’явы з Кітая.
Прэзідэнт Украіны Уладзімір Зяленскі заявіў, што перамовы дазволяць абмеркаваць дыпламатычны працэс з Уіткофам і Кушнерам і атрымаць падрабязнасці сустрэч Трампа.
«Украіна выразна заяўляе пра сваё імкненне да міру, і мы заўсёды працуем канструктыўна», — падкрэсліў ён.
Саюзнікі рыхтуюць дапамогу Украіне
Прэм’ер-міністр Вялікабрытаніі Энды Бернэм заявіў, што сустрэча прадэманструе нязменнасць еўрапейскай падтрымкі Украіны.
Паводле яго слоў, саюзнікі «як ніколі адзіныя ў імкненні забяспечыць справядлівы і трывалый мір, які пакладзе канец гэтай бессэнсоўнай вайне».
Вялікабрытанія таксама павінна абвясціць новыя падрабязнасці пакета дапамогі Украіне. У яго ўвойдуць далёкабойныя беспілотнікі, здольныя наносіць удары ў глыбіню тэрыторыі Расіі, а таксама выведвальныя і лагістычныя дроны.
Reuters адзначае, што еўрапейскія краіны, якія забяспечваюць асноўную частку дапамогі Украіне, пераважна застаюцца ўбаку ад перамоў Вашынгтона з Масквой. На мінулым тыдні яны накіравалі прадстаўнікоў у Абу-Дабі, аднак у Крамлі заявілі, што не ўзгаднялі ўдзел еўрапейцаў у наступных раундах.