Памежная служба Латвіі: Беларусь дакладна ведала пра тунэлі для мігрантаў на мяжы

Больш за тое, беларускія памежнікі садзейнічалі іх будаўніцтву.

Два падземныя тунэлі на латвійска-беларускай мяжы, праз якія нелегальныя мігранты пранікалі з Беларусі ў Латвію, былі выкапаныя з ведама беларускіх службаў. Акрамя таго, верагодна, што беларускі бок сачыў за набліжэннем латвійскіх памежнікаў.

Пра гэта заявіў кіраўнік Дзяржаўнай памежнай службы Гунціс Пуяц у інтэрв'ю «Латвійскаму радыё». На яго думку, выяўлены напрыканцы жніўня тунэль быў настолькі вялікі, што беларускія памежнікі проста не маглі яго не заўважыць.

Пачатак тунэлю, выяўленага напрыканцы жніўня, знаходзіцца на глыбіні больш як 10 метраў на супрацьлеглым, беларускім, баку.

«Я ўпэўнены, што былі назіральнікі [з беларускага боку], якія дакладвалі, і работы спыняліся ў той момант, калі набліжаўся памежны патруль. (…) Абсалютна відавочна, што пабудаваць такі тунэль без ведама беларускіх памежнікаў немагчыма. Вышыня і шырыня другога тунэлю складалі 0,8 метра, даўжыня — не менш за 30 метраў. Вонкі вывезлі 28 кубаметраў грунту, даволі аб'ёмныя апоры, плюс уладкавалі фанерны дах», — каментуе кіраўнік памежнай службы Латвіі.

Пуяц выказаў здагадку, што беларускія памежнікі маглі выкарыстоўваць цеплавізійныя камеры для адсочвання набліжэння латвійскіх памежнікаў.

«Будаўніцтва там мела даволі амбіцыйны характар, таму службы былі дакладна праінфармаваныя і забяспечаныя ўсім, каб зямляныя работы не заўважылі латвійскія памежнікі», — дадаў ён.

Пуяц згадаў, што ўсяго ў Літве выявілі 12 такіх тунэляў для мігрантаў, а ў Латвіі — два, але ў будучыні іх колькасць можа павялічыцца.

«Я б сказаў, што мы чакаем наступнага тунэлю. Ёсць паведамленні, што яны капаюць. Гэта толькі пытанне часу», — сказаў Пуяц.

Аднак Пуяц запэўніў, што нікому не ўдалося паспяхова перайсці латвійскую мяжу праз гэтыя два тунэлі: нелегалаў выявілі і затрымалі вельмі хутка.

«Думаю, у цэлым за гэты год я магу сказаць, што 95 працэнтаў [парушальнікаў мяжы былі затрыманыя]», — адзначыў ён.

На дадзены момант у Латвіі знайшлі два падземныя тунэлі, праз якія мігранты планавалі незаконна трапіць з Беларусі ў Латвію: у валасці Скрудаліена, Аўгшдаугавскі край, і ў Краславе. Апошні аказаўся значна даўжэйшы за першы. Пры гэтым былі затрыманыя 28 чалавек, якія праходзілі праз тунэль.

Аперацыя «Вілкатыс» пачалася ў Латвіі 11 жніўня для барацьбы з нелегальнай міграцыяй. Ваенна-паветраныя сілы Латвіі павялічылі колькасць асабовага складу і тэхнікі для падтрымкі памежнай службы, пачалі выкарыстанне беспілотных лятальных апаратаў, верталётаў і самалётаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]