Абсурдная ракіроўка Лукашэнкі

За стан беларускай арміі робіцца трошкі трывожна.

Вялікая ракіроўка, калі вайсковых адправілі ў армію, а аграрыяў у палі была не дарма. Вайскоўцы, праўда, знішчальнай перамогі над ураджаем не дасягнулі. Затое аграрыі змаглі сябе праявіць. Паводле слоў Лукашэнкі, дармаеды, якіх ён загадаў адправіць у войскі, паказалі прыклад выдатнай баявой падрыхтоўкі. За стан беларускай арміі робіцца трошкі трывожна.

«Твары светлыя, працуюць, выконваюць усё, што афіцэр скажа. Ды ніякіх прэтэнзій. Яны зямлянкі вырылі лепш, чым у Мінску кватэры абсталявалі. Вось табе і п'яніцы, такія-сякія», — уміляўся Лукашэнка на нарадзе ў чацвер.

Ну і як было не ўміляцца? Бо чым больш Лукашэнка спрабаваў растлумачыць народу сэнс сваёй ідэі вялікай ракіроўкі, тым больш абсурднай гэтая ідэя выглядала. А Лукашэнку ж крыўдна.

«Некаторыя так — «хі-хі, ха-ха» — успрынялі, калі я сказаў на селектарнай нарадзе нядбайных, алкашаў і іншых, хто не жадае працаваць на зямлі падчас уборкі ўраджаю, — на фронт», — пакрыўдзіўся Лукашэнка.

Прычым, судзячы з вынікаў, ідэя не знайшла захопленай падтрымкі нават сярод яго ўласных чыноўнікаў. Як сказаў Лукашэнка, ён разлічваў адправіць на перавыхаванне тысячы. Аднак у выніку на ўсю краіну набралася ўсяго 500 чалавек.

Бо чыноўнік таксама, можна сказаць, чалавек. Чыноўнік не хоча ў турму. Чыноўнік разумее, што сёння ён адправіць людзей у войска, а заўтра з яго спытаюць за недабіты ўраджай. Бо калі масава адправіць нядбайных работнікаў у войска, то біцца з ураджаем будзе няма каму.

Таму дзяржаўны апарат імітаваў бурную дзейнасць і наскрэб па ўсёй краіне некалькі соцень чалавек, якіх не шкада. І раптам тыя, каго не шкада, аказаліся выдатнікамі баявой і палітычнай падрыхтоўкі. Па крайняй меры, у падачы Лукашэнкі.

«Нармальныя мужыкі. Прайшлі перападрыхтоўку. Я кажу: «Усім зброю, як вайсковым. Пераапрануць, пагаліць, падстрыгчы. І туды». Баявое зладжванне, усё зрабілі па апошніх стандартах. Мабільныя групы, тактычныя групы», — захапляўся ён.

Таму 170 лепшых дармаедскіх байцоў Лукашэнка загадаў адправіць на самы напружаны ўчастак. То-бок на абарону беларуска-ўкраінскай мяжы.

«Усё, што трэба нам для абароны мяжы. Мы ж не ваюем ва Украіне, а мяжу абараняць трэба».

І атрымліваецца, што ўвесь расхвалены спецназ беларускіх ССА можа замяніць просты вясковы дармаед пасля пары тыдняў вайсковай падрыхтоўкі. Увогуле, за стан беларускай арміі робіцца неяк трывожна.

Андрэй Бранішэўскі, planbmedia.io

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]