Касмічны карабель SpaceX упершыню ў гісторыі вярнуўся з арбіты на стартавую пляцоўку
4- 15.11.2026, 8:55
- 3,338
Гэта важны крок да стварэння поўнасцю шматразавай ракеты.
Карабель Starship пасля 22-гадзіннага палёту на арбіце ўпершыню вярнуўся на стартавую вежу SpaceX у Тэхасе, дзе яго злавілі механічныя «рукі». Гэта важны крок да стварэння поўнасцю шматразавай ракеты.
Пра гэта паведамляе Reuters.
Ракета стартавала 13 лістапада з касмадрома Starbase ў Тэхасе. Гэта быў яе 15-ы выпрабавальны палёт.
Верхняя ступень Starship абляцела Зямлю 14 разоў за 22,5 гадзіны, гэта самая працяглая місія ў гісторыі праграмы. На вышыні каля 260 км карабель вывёў на арбіту 26 спадарожнікаў Starlink.
14 лістапада Starship уключыў рухавік над Ціхім акіянам і пачаў спуск у атмасферу, вытрымаўшы каласальнае награванне. Над Starbase карабель разгарнуўся вертыкальна і павольна апусціўся ў механічныя «рукі» вежы, якую называюць «Мехазілай».
«Гэта адсутнае звяно, святы Грааль касмічных палётаў», — пракаментаваў вядучы трансляцыі SpaceX Дэн Хуот.
У той жа час першая ступень, ракета-носьбіт Super Heavy, вярнуцца на стартавую пляцоўку не змагла. План упершыню злавіць абедзве часткі ракеты за адну місію праваліўся.
Ілон Маск хоча стварыць ракету, якая будзе лётаць у космас і назад настолькі ж рэгулярна, як камерцыйныя самалёты, з мінімальным рамонтам паміж палётамі. Цяпер у ракеты Falcon 9 шматразовая толькі першая ступень, а другая пасля кожнага запуску падае ў акіян.
Аднак цеплаабарона Starship з чорных шасцікутных плітак пакуль не цалкам шматразовая, і SpaceX распрацоўвае новыя варыянты.