«У нас лопнула цярпенне»: у Менску працоўныя абвясцілі страйк

Страйк пачаўся праз затрымкі заробку.

У рэдакцыю звярнуліся працаўнікі сталічнага прадпрыемства ў вытворчасці дзвярэй «ВКТ Канстракшн». «Мы ўжо другі дзень бастуем - два цэхі стаяць. Нам некалькі месяцаў не выплачваюць заробак. За верасень яшчэ нейкія капейкі далі, на гэтым усё», - распавядае адзін са страйкоўцаў. Кіраўніцтва прадпрыемства факт забастоўкі адмаўляе, кажа, што «ніхто ў іх не бастуе, работнікі фарбуюць дзвярныя скрынкі, сёння ў плане тры адгрузкі», паведамляе tut.by.

Са слоў работнікаў, на прадпрыемстве «ВКТ Канстракшн» з учорашняга дня стаіць вытворчасць.

- Нам не плацяць заробак, - распавядае адзін са страйкоўцаў. - За верасень яшчэ цалкам не разлічылі, за кастрычнік наогул цішыня. А ўжо палова лістапада прайшла.

Работнікі завода кажуць, што паводле кантракта заробак ім павінны плаціць на 10 дзень кожнага месяца.

- Дырэктар сказаў, каб мы на кантракт не глядзелі, ён будзе нам плаціць 25-га. Але 25 кастрычніка ўжо даўно прайшло, не кажучы ўжо пра верасень, а грошай няма, - прадаўжае мужчына. - 25-га давалі грошы толькі пару разоў. У нас лопнула цярпенне.

Тое, што вытворчасць стаіць, пацвердзіў і яшчэ адзін работнік.

- Цэх дрэваапрацоўкі і металаапрацоўкі стаіць. За верасень і кастрычнік заробак яшчэ не выплачвалі, - кажа мужчына. - Свае абавязацельствы - плаціць заробак - кіраўніцтва выконваць не хоча. Заказы ў прадпрыемства ёсць, адгрузкі ідуць. Але дырэктар кажа, што грошай у нас няма.

Як распавядаюць супрацоўнікі прадпрыемства, затрымкі заробку пачаліся, калі ў іх змянілася кіраўніцтва. І страйк гэты ўжо не першы.

- У мінулы раз мы страйкавалі летам. Цэлы тыдзень не працавалі. Потым нам выдалі частку запазычанасці ў заробку. Мы пачалі працаваць. Крыху пазней аддалі астатнія грошы. Мы працаваць не хочам, няма матывацыі ніякай. Нас прыкладна 80 чалавек. І ўсім не даюць заробак, - кажуць людзі.

Са слоў работнікаў, кожны месяц яны атрымліваюць розную суму, у іх не фіксаваны заробак.

- Кожны месяц атрымліваецца розная сума. Часам бывае пад 1000 рублёў выходзіць. А за верасень далі пакуль толькі голы аклад. Я атрымаў менш за 400 рублёў на рукі. За кастрычнік разлік быў, там больш выйшла, блізу 900 рублёў на рукі. Але гэта толькі са слоў начальства, разліковага лістка я не бачыў, - кажа працаўнік. - Кампанія займаецца ў асноўным вытворчасцю дзвярэй. Але і тавары народнага спажывання таксама вырабляем - талеркі з дрэва, апрацоўчыя дошкі і гэтак далей.

Праз сітуацыю з заробкам, як распавядаюць працаўнікі, некаторыя звальняюцца.

- Застаюцца ў асноўным тыя, хто доўга тут працуе, - адзначае адзін са страйкоўцаў. - Я яшчэ трошкі пачакаю. Калі сітуацыя не зменіцца, таксама звольнюся.

Страйкаваць працаўнікі завода маюць намер датуль, пакуль ім не выплацяць усё.

Дарэчы, у інтэрнэце на сайтах з водгукамі аб працы ў розных арганізацыях і фірмах скаргаў на тое, што на гэтым прадпрыемстве не плацяць заробак, таксама дастаткова. Першая апублікаваная ў студзені 2018 года.

Па каментар аб сітуацыі мы звярнуліся да кіраўніцтва прадпрыемства.

- Я цяпер на заводзе, ніякага страйка не назіраю, - сказаў намеснік дырэктара прадпрыемства. - Не выключана, што ў нас на 2-3 тыдні ёсць затрымка заробку.

Але пацвердзіць факт, што людзі не атрымалі заробак за верасень, я не магу. Завод вялікі, працуе 150 чалавек. Аднаму работніку маглі яшчэ нешта недаплаціць, а другому ўжо і ўсё выплаціць. Але рабочыя - гэта такая катэгорыя людзей, якая любіць абагульняць і рабіць з прыватнага выпадку нейкую агульную сітуацыю. У нас сёння запланаваныя тры адгрузкі. Ідзе праца, фарбуюцца дзвярныя скрынкі, пакуюцца палотны. Не ведаю, хто ў нас стаіць.