Як Якубовіч і Давыдзька радуюцца блакаванню Charter97.org

Дзяржаўныя прапагандысты заявілі, што блакаванне «Хартыі-97» - гэта пасланне ўсім журналістам.

«Новы год пачынаецца з ачышчэння. Трэба заўсёды вымыць кватэру і вычысціць усё тое, што перашкаджае нармальна развівацца», - заявіў старшыня Белтэлерадыёкампаніі і кіраўнік «Белай Русі» Генадзь Давыдзька ў эфіры «Клуба рэдактараў» на «Беларусь 1», каментуючы блакаванне сайта «Хартыя'97».

«Да свабоды слова гэта мае досыць ускоснае дачыненне, бо за 20 гадоў і гэты сайт, і многія іншыя сайты пісалі ўсё, што заўгодна, у тым ліку крытыкуючы ўладу. Можа быць, часам не заўсёды канструктыўна, з выпадамі ў бок асобных чыноўнікаў - калі ласка. Але калі пачынаецца экстрэмізм, заклікі да незаконных дзеянняў... І калі пры гэтым выкарыстоўваецца інтэрнэт-рэсурсы, гэта павінна перарывацца гэтак жа, як гэта перарываецца і ў невіртуальным жыцці. Калі ты кагосьці абражаеш на вуліцы, ты панясеш пакаранне. А ў інтэрнэце гэта чамусьці стала нормай, калі на нейкіх старонках альбо ў каментарах можна любымі словамі абразіць чалавека, і нашы праваахоўныя органы не звяртаюць на гэта ніякай увагі», - абурыўся Уладзімір Пярцоў, кіраўнік прадстаўніцтва тэлеканал «Мір» у Беларусі і зяць былога першага намесніка адміністрацыі Лукашэнкі Аляксандра Радзькова.

Рэдактар «Советской Белоруссіі» Павел Якубовіч звярнуў увагу, што блакаванне «Хартыі» - пасланне астатнім удзельнікам медыяпрасторы: «Трэба зрабіць простую выснову: не забывайце, што свабода слова - адказная рэч. Ператварацца ў зброю масавага знішчэння не варта».