ISW: Крэмль больш не можа гэтага хаваць

Бюджэтныя праблемы сталі відавочнымі.

Расійскія ўлады ўсё горш спраўляюцца з маскіроўкай сур'ёзных эканамічных праблем, выкліканых вайной супраць Украіны, заходнімі санкцыямі і пралікамі ў кіраванні эканомікай. Гэтыя цяжкасці ўжо абярнуліся канкрэтнымі аперацыйнымі збоямі, аднак Крэмль не мае намеру спыняць баявыя дзеянні. Пра гэта гаворыцца у новым дакладзе Інстытута вывучэння вайны (ISW).

Паралельна ў Расіі працягваецца падрыхтоўка да магчымай восеньскай мабілізацыі — канчатковае рашэнне, як і раней, застаецца за асабіста Уладзімірам Пуціным.

Бюджэтныя праблемы нарастаюць

Паводле звестак аналітыкаў, дарагая вайна, украінскія ўдары па тэрыторыі РФ, міжнародныя санкцыі і неэфектыўная эканамічная палітыка прывялі да канкрэтных аперацыйных цяжкасцяў для расійскіх уладаў.

Так, 28 жніўня выданне Bloomberg са спасылкай на крыніцы паведаміла, што міністр фінансаў РФ Антон Сілуанаў яшчэ ў красавіку папярэдзіў прэм’ер-міністра Міхаіла Мішусціна пра адмоўны баланс бюджэтнага рахунку Федэральнага казначэйства. Дэфіцыт на той момант складаў 5,5 трыльёна рублёў (каля 63,8 мільярда долараў), што прымусіла ўлады неадкладна абмежаваць выдаткі.

Паводле інфармацыі Bloomberg, Масква ўвяла рэжым жорсткай эканоміі: фінансаванне невайсковых артыкулаў скарацілі на 35%, а федэральным ведамствам даручылі рыхтавацца да 15-працэнтнага скарачэння штату. Раней паведамлялася, што расійскія чыноўнікі безвынікова прасілі Пуціна скараціць абаронныя выдаткі на фоне паглыблення бюджэтнага крызісу.

У ISW адзначаюць: «гэтыя праблемы, якія, як паведамляецца, дасягнулі апагею ў красавіку 2026 года, працягваюць непакоіць расійскіх чыноўнікаў, вядомых расійскіх эканамістаў і шараговых расіян».

Аналітыкі падкрэсліваюць, што цяперашнія цяжкасці носяць кароткатэрміновы і кіраваны характар, але агаляюць структурныя слабасці і хранічна неэфектыўнае кіраванне эканомікай. Асабліва адчувальна гэта б’е па Маскве і Санкт-Пецярбургу — гарадах, якія Пуцін традыцыйна імкнуўся абараніць ад наступстваў вайны.

У ISW лічаць, што Пуцін «працягвае парушаць свой сацыяльны кантракт з расіянамі», абяцаючы абараніць іх ад наступстваў вайны ў абмен на лаяльнасць. Асаблівую вастрыню гэтаму надае тое, што падобныя паведамленні з’яўляюцца менш чым за месяц да выбараў у Дзярждуму 20 верасня — галасавання, якое Пуцін фактычна ператварыў у рэферэндум па сваёй вайне.

Паводле ацэнак аналітыкаў, расійскія чыноўнікі, найбольш верагодна, знойдуць спосаб і далей падтрымліваць баявыя дзеянні нават пры зацяжных эканамічных цяжкасцях — рызыкі хуткага краху эканомікі РФ інстытут не бачыць.

Крэмль рыхтуецца да магчымай мабілізацыі

Адначасова ў Расіі працягваецца падрыхтоўка інфраструктуры для патэнцыйнага прызову рэзервістаў. Мінбароны РФ мае намер пашырыць пералік персанальных даных, якія ваенныя ведамствы змогуць атрымліваць ад дзяржаўных органаў, кампаній і арганізацый пры ацэнцы прыдатнасці грамадзян да службы.

Праект паправак, апублікаваны 28 жніўня, адкрые ваенным чыноўнікам доступ да звестак пра рэгістрацыю, даходы, занятасць, адукацыю, інваліднасць, падаткі, а таксама да банкаўскай і медыцынскай інфармацыі ваеннаслужачых. Аналітыкі называюць гэта часткай доўгатэрміновай стратэгіі Крэмля па стварэнні адзінай лічбавай сістэмы для кіравання прызывам і мабілізацыяй.

Паводле меркавання ISW, гэтая ініцыятыва не азначае, што рашэнне аб мабілізацыі ўжо прынятае — хутчэй, Мінбароны рыхтуе глебу на выпадак, калі Пуцін вырашыцца на гэты крок пасля выбараў у Дзярждуму.

Інстытут нагадвае: «рашэнне аб прымусовым прызыве рэзервістаў у Расіі застаецца асабістым рашэннем Пуціна», якое ён будзе прымаць, зыходзячы з сітуацыі на фронце і ацэнкі ўстойлівасці ўласнага рэжыму.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]