Вольфовіч раптам празрэў

Украінскія дроны добра збіваць у тэлевізары, пакуль яны нікуды не цэляцца.

Нядаўна сакратар Вольфовіч заўважыў, што ўкраінскія дроны залятаюць у Беларусь. І некаторыя залятаюць не проста так, а спецыяльна цэляцца сакратару Вольфовічу ў памежную інфраструктуру.

Праўда, ніводзін аб'ект памежнай інфраструктуры не пацярпеў. Але не таму, што дроны дрэнна цэліліся, а таму, што іх добра збівалі.

Але я цяпер не пра тое, як беларуская СПА збівае дроны ў тэлевізары сакратаром Вольфовічам. Вялікая справа, праўда? Яны ў тэлевізары і не такое збівалі. Хоць сакратаром Вольфовічам, хоць генералам Хрэнінам.

Хачу сказаць, што гадамі сакратар Вольфовіч наогул ніякіх дронаў не заўважаў, бо ў сакратара Вольфовіча было мірнае неба над галавой. І вось раптам ён заўважыў адразу 116 штук за адзін тыдзень. Пагадзіся — гэта дзіўнае празрэнне.

Таму разумныя людзі з Інстытута вывучэння вайны лічаць, што сакратар Вольфовіч празрэў не проста так, а з сэнсам. А сэнс у тым, каб апраўдаць будучыя ўдары па Украіне з беларускай тэрыторыі.

Бо Пуціну патрэбны нейкі прарыў у вайне, а прарываць ужо няма дзе. Ды і няма чым. А калі зноў пачаць страляць з беларускай тэрыторыі, дык, можа, дзе-небудзь і прарве.

А яно ж сапраўды прарве. І я разумею, што ў Пуціна могуць быць ілюзіі наконт таго, дзе канкрэтна яно прарве. Ці Пуціну ўсё роўна, бо ён думае, што каму прарве, той хай і перажывае. Але я крыху не разумею сакратара Вольфовіча. Бо сакратар Вольфовіч жа ўсё ведае пра сваю баяздольнасць. Ён яе нядаўна асабіста правяраў.

Ведаеш, я ў сучасных стратэгіях і тактыках не разбіраюся, але разумныя людзі, якія вывучаюць вайну, кажуць, што ў сваім бягучым стане беларуская армія чыста тэхнічна не здольная ваяваць. Нават тры дні.

А я ўжо і не кажу пра ўменні і навыкі. Учора ў тэлевізары паказалі, як прыгажуны ўмеюць класціся пад варожыя танкі. То бок, калі што, прыгажуны могуць здымацца ў кіно пра вайну і немцаў. Ці выступаць у цырку. Але маіх ведаў у стратэгіях і тактыках не хапае, каб зразумець, як навык класціся пад варожыя танкі дапаможа прыгажунам супраць украінскіх дронаў.

Карацей, разумныя людзі кажуць, што каб арміі хапіла на тры дні, трэба правесці мабілізацыю. Але калі правесці мабілізацыю і раздаць беларусам зброю, то сакратар Вольфовіч жа ведае, што ніхто не пойдзе ваяваць у такую далеч. І што тады нават генерала Хрэніна не хопіць, каб зноў абараніць Стэлу.

Дарэчы, украінскія дроны добра збіваць у тэлевізары, пакуль яны нікуды не цэляцца. А чым ты іх будзеш збіваць, калі яны прыцэляцца? Пугівіцамі з «Арэшніка»?

Я, вядома, разумею, што для вялікай мэты сакратару Вольфовічу не шкада ніякага завода ў Мазыры. Але што будзе, калі гэтыя дроны прыцэляцца па месцах дыслакацыі сакратара Вольфовіча?

Вядома, разумныя людзі з Інстытута вывучэння вайны маглі і пагарачыцца. Магчыма, сакратар Вольфовіч нічога такога і не меў на ўвазе. Беларускія генералы ўвесь час кажуць пра нябачную пагрозу, вось і сакратар Вольфовіч сказаў. Спачатку сказаў, а потым… усё роўна не падумаў.

Дык думаць трэба, што гаворыш. Асабліва калі ты дзяржаўны сакратар, а не парсячы хвосцік. Бо цяпер такія часы, калі кожнае ваша слова можа быць выкарыстана супраць вас.

Хоць беларускім генералам да такога, вядома, цяжка прызвычаіцца. Бо беларускія генералы прывыклі, што яны ў прынцыпе ні за што не адказваюць, а асабліва — не адказваюць за свае словы.

Telegram-канал «Лісты да дачкі»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]