«Лукашэнка зразумеў, што асуджаны»

Калі Масква захоча перарэзаць Сувалкскі калідор, Мінску не ўдасца ўнікнуць гэтага.

Лукашэнка прысягае ў вернасці Крамлю, але спадзяецца на бізнес з амерыканцамі. Пра тое, што крыецца ў словах саагрэсара і ягоных сапраўдных страхах, піша на «Позірку» палітычны аналітык Аляксандр Класкоўскі.

2 кастрычніка Аляксандр Лукашэнка адкатаў свой стары нумар: кляўся ў вернасці Расіі, «Мы ніколі не былі здраднікамі», — заявіў кіраўнік, сустракаючыся ў Мінску з кіраўнікамі дэлегацый — удзельнікаў пасяджэння Еўразійскага міжурадавага савета.

Але д'ябал хаваецца ў дэталях. Лукашэнка дэ-факта пацвердзіў здагадку незалежных аналітыкаў, што яму даводзіцца спрачацца з гаспадаром Крамля ў пытаннях вайны супраць Украіны.

— Я прэзідэнту Пуціну адкрыта пра гэта сказаў: у мяне ёсць сваё разуменне асобных аспектаў канфлікту ва Украіне, — сказаў беларускі аўтакрат прэм'ерам краін ЕАЭС. І дадаў для балансу: «…Але мы заўсёды будзем прыхільныя нашаму агульнаму курсу».

Далей ён нагадаў: маўляў, яшчэ ў першыя дні канфлікту ва Украіне я наўпрост заявіў, што Беларусь ніколі не дазволіць страляць у спіну Расіі.

Гэтым патэтычным тэзісам ён прыкрывае нежаданне пасылаць беларускіх салдат на вайну. Маўляў, трэба ж прыкрываць рускіх братоў ад верагоднага ўдару вераломных натаўцаў.

Показальная яшчэ адна агаворка гаспадара сустрэчы: «Мы вашы сябры, і вы можаце на нас разлічваць. Нават у самыя складаныя часы, нават тады, калі нам, магчыма, не вельмі выгадна».

Потым прагучала: «Не толькі расіяне, рускія людзі, але і вы ўсе для нас не чужыя». Аднак чамусьці здаецца, што пасаж пра сітуацыйную нявыгаднасць сяброўства найперш тычыўся менавіта Масквы, з-за якой Мінск апынуўся саагрэсарам і трапіў пад санкцыі.

Пуцін на «Валдаі»: калінінградская тэма

Дарэчы, Лукашэнка падтрымаў агучаны днём раней на пасяджэнні Міжнароднага дыскусійнага клуба «Валдай» тэзіс Уладзіміра Пуціна пра тое, што свет падышоў да вырашальнага, паваротнага моманту развіцця, а чалавецтва ўвайшло ў абсалютна новую рэальнасць.

— Свет цяпер вельмі сур'ёзна змяняецца. Вельмі сур'ёзна. І тое, што мы сёння запланавалі, заўтра ўжо можа аказацца немагчымым. У сілу зменлівых умоў у нашым гэтым шалёным свеце, — пусціўся ў разважанні Лукашэнка.

Заўважым, што на Захадзе многія ўспрынялі заявы Пуціна на «Валдаі» як трывожныя.

Ён, здаецца, казаў пра гатоўнасць да мірных перамоваў па Украіне. Але з кантэксту вынікала, што дамаўляцца ён гатовы толькі на сваіх умовах. А менавіта: каб украінцы здалі ўвесь Данбас, каб іх краіна была нейтральнай (чытай: не ўступала ў НАТА), каб гарантавалася становішча рускай мовы, Рускай праваслаўнай царквы і г.д.

Але яшчэ больш трывожны вось гэты пасаж:

— Калі дойдзе да прамога нападу на Расійскую Федэрацыю, у дадзеным выпадку маецца на ўвазе Калінінград, але, можа быць, і нейкія іншыя тэрыторыі, вядома, у парадку дня непазбежна і неадкладна ўзнікне пытанне пра прымяненне Расійскай Федэрацыяй усяго ўзбраення, што ёсць у распараджэнні нашай краіны.

Прасцей кажучы, расійскі ўладар пагражае ядзернай зброяй. Так, гэта падаецца як варыянт абароны. Але ж на тым самым «Валдаі» Пуцін і паўнамаштабную вайну супраць Украіны апісаў так: «Гэта не мы хацелі і не мы пачалі ваяваць, а з намі пачалі ваяваць».

Цяпер Крэмль пачаў раздуваць тэму верагоднай блакады калінінградскага эксклава. Днямі Масква накіравала ў НАТА дыпламатычны дакумент, у якім заявіла, што мае інфармацыю пра падрыхтоўку альянсу да паветранай і марской блакады Калінінградскай вобласці. І тады, маўляў, Расія гатовая ўжыць «увесь арсенал сіл і сродкаў», уключаючы ядзерную зброю.

З-за чаго сыр-бор? Па-першае, Масква перажоўвае яшчэ майскае выказванне міністра замежных спраў Літвы Кястуціса Будрыса пра тое, што «НАТА ў разе неабходнасці мае магчымасць зраўняць з зямлёй расійскія сістэмы СПА і ракетныя базы ў Калінінградскай вобласці».

Па-другое, ідзе спекуляцыя вакол таго, што Паўночнаатлантычны альянс нарошчвае прысутнасць у балтыйскім рэгіёне. І, у прыватнасці, праводзіць вучэнні, падчас якіх адпрацоўвае сцэнары магчымага канфлікту з Расіяй. Зразумела, што ў легендзе такіх вучэнняў фігуруе і стратэгічна важны калінінградскі анклав.

Калі Масква захоча перарэзаць Сувалкскі калідор, Мінску не ўдасца ўнікнуць

Выступаючы на «Валдаі», Пуцін заявіў, што цэнтральнай пагрозай для міру з'яўляецца разбурэнне ранейшай сістэмы міжнародных правілаў. Лукашэнка, падтрымліваючы валдайскія тэзісы «старэйшага брата», вядома ж, прамаўчаў пра тое, што разбуральнікам міжнароднай сістэмы бяспекі выступіла найперш Расія.

Але Лукашэнка не можа не разумець: тое, што Масква цяпер нагнятае тэму небяспекі для Калінінграда, нясе вялікія рызыкі для Беларусі.

Бо пры жаданні (вопыт вялікі) расіяне могуць арганізаваць правакацыю пад чужым сцягам: праклятыя супостаты пасягнулі на родную Калінінградчыну. А тады Масква, нібыта ў абаронных мэтах, можа задзейнічаць сцэнар, які не абмяркоўваў хіба толькі лянівы: перарэзаць Сувалкскі калідор — вузкую палоску зямлі паміж Літвой і Польшчай.

І ў гэтым сцэнары Беларусь непазбежна ўцягваецца ў канфлікт проста з прычыны сваёй геаграфіі.

Так, пакуль такое развіццё падзей малаверагоднае. Але і ў 2022-м многія не верылі, што Пуцін адважыцца на «бліцкрыг» супраць Кіева.

Кіраўнік Беларусі хоча падчапіць на кручок амерыканскі бізнэс

Тым часам Лукашэнка, у адрозненне ад Пуціна, даволі далёка прасунуўся па амерыканскім трэку. І ён не проста дзеля эканамічнай выгоды прапануе амерыканцам набыць калійны актыў. Чым мацнейшымі будуць бізнес-інтарэсы ЗША ў Беларусі, тым больш у Лукашэнкі магчымасцяў ствараць процівагу расійскаму ціску.

Менавіта ў гэтым кантэксце варта разглядаць і тое, што Лукашэнка прапанаваў амерыканцам далучыцца да будаўніцтва ў Беларусі азотнага камбіната.

— З Уладзімірам Уладзіміравічам [Пуціным] дамовіліся, што «Газпрам» падключыцца ў нас да рэалізацыі праекта па будаўніцтве азотнага камбіната. Трэба амерыканцам прапанаваць. Яны хочуць угнаенні — азотныя ў тым ліку — калі ласка, давайце разам пабудуем. У нас ужо пляцоўка падабраная, усе сеткі існуюць», — заявіў кіраўнік 29 верасня на сустрэчы ў Мінску з губернатарам Ульянаўскай вобласці Аляксеем Русскіх.

Лукашэнка, напэўна, пралічвае і палітычную перспектыву. Калі амерыканскі бізнес увайдзе ў калійную, хімічную і іншыя галіны беларускай эканомікі, то цікавасць ЗША да Беларусі не знікне і пасля сыходу Трампа. А значыць, можна будзе разлічваць на пэўную пратэкцыю з боку Вашынгтона.

Аднак, па-першае, не факт, што амерыканцы так моцна зацікавяцца прапановамі аўтакрата. Па-другое, у любым выпадку прывязанасць да Расіі настолькі моцная, што перспектывы знешнепалітычнага балансавання Мінска вельмі праблематычныя.

Гэта, напэўна, ўсведамляе і Лукашэнка. На сённяшняй сустрэчы, як падаецца, з ноткай асуджанасці прагучала: «Калі вы, кіраўніцтва Расіі, прымяцё рашэнне, мы заўсёды будзем з вамі…»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]