У Расеі прад'яўленыя першыя абвінавачванні па «балотнай справе»

Канчатковае абвінавачванне прад'яўлена Аляксандры Духанінай, Яраславу Белавусаву і Уладзіміру Акімянкову.

Яраслаў Белавусаў абвінавачваецца ў здзяйсненні злачынстваў па артыкулах «удзел у масавых беспарадках» і «прымяненне гвалту да прадстаўніка ўлады», паведамляе forbes.ru са спасылкай на прэс-службу Следчага камітэта Расеі.

Па версіі следства, «ён кідаў камяні і кавалкі асфальтавага пакрыцця ў супрацоўнікаў паліцыі, прарываў ачапленне і наносіў удары прадстаўнікам улады».

Аляксандра Духаніна абвінавачваецца па тых жа артыкулах, што і Белавусаў - ва ўжыванні гвалту ў дачыненні да супрацоўнікаў паліцыі, якія забяспечвалі ахову грамадскага парадку пры правядзенні публічных мерапрыемстваў.

Уладзімір Акімянкоў абвінавачваецца па артыкуле «удзел у масавых беспарадках».

Нагадаем, узгоднены з уладамі мітынг на Балотнай плошчы 6 траўня завяршыўся сутыкненнямі з паліцыяй. Пацярпелі дзесяткі чалавек з абодвух бакоў, больш 400 дэманстрантаў былі затрыманыя.

Па факце беспарадкаў была ўзбуджаная крымінальная справа, у рамках якой былі дапытаныя лідэры апазіцыі, у іх кватэрах прайшлі ператрусы. Цяпер пад следствам знаходзяцца 18 чалавек.