У Расіі закіпае бітва жабы з гадзюкай
9- Васіль Верас, «Салідарнасць»
- 21.05.2026, 10:16
- 10,332
Расійскія прапагандысты сцепіліся з-за Чынгісхана.
Зусім нядаўна «Салідарнасць» пісала пра тое, чым беларусаў ад расіян адрознівае стаўленне да Залатай Арды. І быццам па заказе маскоўскія палітрукі падкінулі свежы матэрыял на гэтую тэму.
Усё пачалося з таго, што Вярхоўны хурал Рэспублікі Тыва (радзіма Сяргея Шайгу, шматгадовага паплечніка Уладзіміра Пуціна) зацвердзіў ордэн Субэдэя, які будуць уручаць «за выключныя заслугі ў абароне Айчыны, мужнасць і адвагу».
Гэты мангольскі палкаводзец лічыцца галоўным ваенным стратэгам і «найлютым псам» Чынгісхана. Ва многім менавіта дзякуючы Субэдэю Паўночна-Усходняя Русь была амаль цалкам спустошаная.
Менавіта гэты военачальнік учыніў знакамітую рытуальную расправу над палоннымі пасля бітвы на рацэ Калка. Манголы паклалі іх пад драўляныя дошкі, на якіх учынілі бяседу, у выніку чаго рускія князі былі раздавлены насмерць.
На рахунку Субэдэя нямала вырэзаных гарадоў, уключна з Масквой, якая тады была літаральна сцёртая з твару зямлі. Летапіс гаворыць на гэты конт: «люди избиша от старца и до сущих младенец». Апусцелы горад спалілі. На месцы цяперашняй расійскай сталіцы тады засталіся толькі папялішча і горы трупаў.
«Арда праз кроў і боль зрабіла жыццё простага рускага народа значна лепшым і спакайнейшым»
Вядомы расійскі прапагандыст Сяргей Мардан развіў парыў хурала, прапанаваўшы ўжо на федэральным узроўні заснаваць ордэн Чынгісхана:
«Нашчадкі Чынгісхана кардынальна скарацілі маштабы пастаяннай (!) вайны на Русі.
Масавыя забойствы пры ўзяцці мангольскімі тумэнамі рускіх гарадоў часцей былі выкліканыя як недагавораздольнасцю князёў, так і таптаннем усіх правілаў таго часу…»
Далей Мардан распісвае перавагі сярэднявечнай татарска-мангольскай сістэмы падаткаабкладання ў параўнанні з цяперашняй расійскай (!!! — С.):
«Для простых станаў ардынская даніна складала ўсяго 10% пасля продажу выніку працы або ад іншага даходу. А для купцоў і таго меней — невялікі працэнт з абароту.
Вы, на хвілінку, проста параўнайце гэта з цяперашняй расійскай сістэмай падаткаабкладання. НДС, падатак на прыбытак, НДФЛ, выплаты ў нейкія сацфонды і іншыя бясконцыя паборы, пасля якіх вам застаецца толькі шкурка ад банана».
(Баявік ідэалагічнага фронту, усхваляючы Залатую Арду, падаецца, і сам не зразумеў, што пры гэтым апусціў сучасную РФ ніжэй плінтуса — С.)
Выснова ж Мардана такая:
«У цэлым Арда праз кроў і боль зрабіла жыццё простага рускага народа (!) і Рускай Царквы значна лепшым і спакайнейшым, чым яно было да таго. А князёў навучыла нармальнаму дзяржаўнаму кіраванню, палітыцы, працы выканаўчай улады і г.д.
Дык што, калі ўжо ставіць помнікі Сталіну, дык Чынгісхан дакладна заслугоўвае свайго помніка з падзякай ад рускага народа».
«Можна цалкам спакойна плюнуць на магілы мільёнаў закатаваных людзей»
Рэзюмэ Сяргея Мардана назваў «цалкам справядлівым» Аляксандр Дугін. Але з любімым пісьменнікам кіраўніка Беларусі пагадзіліся не ўсе.
Імперац Дзмітрый Кананыхін напісаў тэкст, які перапостылі многія з z-супольнасці:
«Канцэнтраваная подласць не мае межаў. Аказваецца, татары выразалі Рязань па віне князёў, што стаялі за веру хрысціянскую.
Як зручна быць Марданам!
Аказваецца, Кіеў быў выразаны так, што чарапы хрумсцелі пад капытамі многія дзесяцігоддзі — таму што рускія не хацелі плаціць усяго толькі дзесяціну.
Як зручна быць Марданам!
Аказваецца, татары пілі і елі на памосце, пад якім трашчалі «косці рускіх князёў», бо гэта рускія князі ваявалі між сабой, а татарва прынесла дурным рускім мір.
Як зручна быць Марданам!
Аказваецца, можна цалкам спакойна плюнуць на магілы мільёнаў закатаваных рускіх людзей, каб, як чорны пудзель, выслужвацца.
І стаць Марданам».
А аперны спявак Сяргей Маскалькоў дадаў:
«Іга-то ніякага не было, аказваецца, паводле меркавання Мардана-Іудана. Гэта рускія самі такія дзікія і адсталыя. Цяпер яшчэ і ў параўнанні не толькі з Еўропай, але і з Азіяй».
P.S. «Салідарнасці»
Да гэтага шэдэўральнага раўнда бітвы жабы з гадзюкай можна дадаць толькі адно.
Так, вы менавіта такія, як самі пра сябе пішаце. Дзікія. Адсталыя. Падлыя. Цалкам спакойна плюючыя на магілы мільёнаў закатаваных людзей. А гісторыя ў дадзеным выпадку — толькі люстэрка, у якім адлюстроўваецца расійская сучаснасць.
Васіль Верас, «Салідарнасць»
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
