У расійскіх дронах зноў выявілі новыя замежныя кампаненты

Дэталі выраблены ўжо ў 2025 годзе.

У беспілотніках, якімі Расія атакуе Украіну, нягледзячы на ўведзеныя санкцыі, працягваюць выяўляць новыя заходнія дэталі, вырабленыя ў 2025 годзе.

Пра гэта ўпаўнаважаны прэзідэнта па пытаннях санкцыйнай палітыкі Уладзіслаў Уласюк паведаміў «Укрынформу».

Ён адзначыў, што, як паказалі апошнія дні, Расія не зніжае інтэнсіўнасць атак на ўкраінскія гарады — пад ударамі Адэса, Дніпро, Вінніца, Цярнопаль, Харкаў. Масава прымяняюцца «Шахеды», а па Харкаве дадаткова выкарыстоўваюцца дроны тыпу V2U.

«Паказальна і іншае: у дронах, якія атакавалі Украіну мінулага тыдня, мы зноў выяўляем новыя, свежыя кампаненты 2025 года, вытворчасці Германіі, Японіі, Швейцарыі, ЗША, а таксама Тайваня і Вялікабрытаніі», — падкрэсліў упаўнаважаны.

Па яго словах, упершыню быў зафіксаваны новы элемент — блок актывацыі Transit Brd. Саветнік прэзідэнта запэўніў, што ўсе даныя пра гэтыя кампаненты ўжо перададзены партнёрам.

Акрамя таго, па яго словах, украінскі бок працягвае знаходзіць дэталі STMielectronics (Швейцарыя) «нягледзячы на заклікі кантраляваць, куды менавіта прадаецца іх прадукцыя».

Расія працягвае знаходзіць доступ да заходніх тэхналогій, нягледзячы на абмежаванні, менавіта таму санкцыйны ціск павінен пастаянна ўзмацняцца і закрываць такія каналы паставак, падкрэсліў Уласюк.

«У той жа час ёсць і вынік. У новых узорах дронаў мы практычна не бачым кампанентаў з Нідэрландаў. Гэта прамое сведчанне таго, што сістэмная праца з партнёрамі дае эфект і дазваляе перакрываць доступ да крытычных тэхналогій», — адзначыў упаўнаважаны.

Ён дадаў, што Украіна працягвае нарошчваць так званыя дальнабойныя санкцыі. Ён адзначыў, што Украіна працуе над фармаваннем пераліку крытычнага абсталявання для нафтаперапрацоўчых заводаў і нафтаперакачвальных станцый, каб абмежаваць яго экспарт у РФ: «Ідзе гаворка пра накіраваны ціск на энергетычную інфраструктуру, якая фінансуе вайну».

«Наш падыход просты: перакрываць доступ да тэхналогій, якія выкарыстоўваюцца ў вайне, і паралельна скарачаць рэсурсы, за кошт якіх гэтая вайна вядзецца. Усю інфармацыю перадалі нашым партнёрам», — дадаў Уласюк.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]