«Ногі выціраюць, паперкі ў урны кідаюць»: расіянку шакавала Беларусь

У каментарыях разгарэліся сапраўдныя баталіі.

Выкладчыца англійскай з Расіі Анастасія Мазурская прыехала ў Беларусь і падзялілася ў Threads сваімі назіраннямі пра адрозненні мясцовых жыхароў ад расіян. Сярод таго, што ўразіла жанчыну, — «няправільны» націск і «дзіўнае» выкарыстанне крышкі ад унітаза. Каментатары не змаглі прайсці міма — пад пастом разгарэліся сапраўдныя баталіі, піша «Зеркало».

Як распавяла Анастасія, яна ў Беларусі ўжо тры тыдні і за гэты час заўважыла «некалькі адрозненняў».

«Беларусы часта няправільна ставяць націскі (яны кажуць водУ, родИла, спинУ). Многія з тых, у каго я пыталася, не ведаюць пра тварожную пасху. П’юць ваду з-пад крана і лічаць, што гэта норм. Гэта дзіўна, але чамусьці ўсюды апускаюць крышку ад унітаза (вось такое цудоўнае назіранне)», — напісала яна.

Таксама, паводле слоў жанчыны, яна чула ад беларусаў, што «russian people (расіяне. — Заўв. рэд.) вельмі злыя». Напрыканцы Анастасія спытала ў аўдыторыі: «Чым, як вам здаецца, беларусы адрозніваюцца ад russian people?»

Усяго за суткі пост расіянкі паглядзелі 170 тысяч разоў. Каментарыяў пад ім таксама нямала. Пры гэтым, калі арыгінальны пост пазначылі лайкам менш за 200 чалавек, адказы расіянцы (часта негатыўныя) набіраюць тысячы рэакцый.

Хтосьці адказваў па сутнасці — каментаваў змест паста жанчыны. Напрыклад, частка людзей тлумачыла Анастасіі, што не так з яе назіраннямі, і распавядала пра іншыя адрозненні.

«1. Гэта абумоўлена роднай беларускай мовай, таму націскі могуць быць розныя. 2. Тварожная пасха проста не распаўсюджаная. 3. Ваду з-пад крана ў нас піць можна. 4. Крышка абараняе ад распаўсюджвання мачы і фекалій у памяшканні».

«Беларусы проста іншыя. Бо мы іншая краіна і іншая нацыя. І адрозненняў сапраўды вельмі шмат».

«Ногі выціраюць, паперкі ў урны кідаюць, пераходзяць вуліцу на зялёны. Шмат адрозненняў. Свет цудоўны ў сваёй разнастайнасці».

«Слухайце, у Беларусі ёсць уласная мова. І вось гэтыя, як вам здаецца, няправільныя націскі — гэта яе ўплыў. Па-другое, руская ў Беларусі адрозніваецца ад рускай у Расіі. Так, як і англійская ў Новай Зеландыі, Брытаніі і Амерыцы не ідэнтычная. І гэта нармальна. А па-трэцяе, руская і ў Расіі ў кожным рэгіёне можа адрознівацца. Ёсць такое паняцце — рэгіяналізм. І па-чацвёртае, неяк невыхавана такое пісаць на ўсеагульны агляд. Не дзіва, што беларусы незадаволеныя гасцямі з РФ».

«Ну дык у нас вада артэзіянская па ўсім Мінску, чаму яе не піць?»

Асобна людзей зачапіла здзіўленне Анастасіі з нагоды функцыянальнасці крышкі ўнітаза.

«Інсайт, што крышкай унітаза, аказваецца, можна карыстацца, ужо сведчыць пра тое, што паездка прайшла не дарма».

«А ў вас у Расіі крышка ўнітаза — гэта дэкаратыўны элемент?»

Частка каментароў (і яны аказваліся найболей папулярнымі) — эмацыйная рэакцыя на падобныя пасты турыстаў з суседняй краіны.

«Настэнька, ты ўжо загасцявалася ў Беларусі. Пара і меру ведаць: адчальваць да сябе на балоты. Там і крышку ўнітаза апускаць не трэба з-за адсутнасці ўнітазаў у дамах у большасці насельніцтва, і борматуху можна замест вады піць. І гэта… не прыязджай да нас больш і сваім перадай, каб не ехалі».

«Мы кажам не russian people, а «хай чорт у хату лезе, абы не маскаль», і я лічу, што гэта прыгожа».

«Мы не захопліваем чужыя землі і не забіваем сваіх суседзяў: думаю, гэта наша галоўнае адрозненне. І яшчэ: не вучыце нас, дзе ставіць націск, а то падумаеце, што мы ўціскаем правы рускамоўных, і прыйдзеце іх вызваляць…»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]