Беларус паляцеў лячыць зубы ў Турцыю і цяпер шукае 28 тысяч долараў на выпраўленне

Лекары проста ў шоку.

Аляксандр жыве ў Польшчы, але зубы вырашыў лячыць у Турцыі. У інтэрнэце знайшоў клініку, якая прапаноўвала комплекснае лячэнне па добрай цане. Разам з пражываннем, трансферам і перакладчыкам яно павінна было абысціся яму прыблізна ў 4000 еўра. Аднак ужо пасля першай паездкі пачаліся ўскладненні, што пацягнула дадатковыя выдаткі. Цяпер беларус спрабуе знайсці больш за 100 тыс. злотых, каб пасля турэцкай клінікі аднавіць зубы ў Польшчы. Сваёй гісторыяй ён падзяліўся з MOST.

Склалі план лячэння па здымках

Да паездкі ў Турцыю Аляксандр ужо праходзіў лячэнне ў Польшчы — выпраўляў прыкус і аднаўляў адсутныя зубы. Гэта каштавала дорага, пры гэтым частка зубоў усё ж была страчана. З-за высокіх коштаў ён пачаў шукаць альтэрнатыўныя варыянты.

— Я параўноўваў розныя краіны, дзе канчатковая сума выходзіла меншай, і спыніўся на Турцыі. Да таго ж я баяўся моўнага бар’ера, таму выбраў клініку з рускамоўным кансультантам.

Па здымках, зробленых у Польшчы, у клініцы склалі план лячэння. Прапановы цэны — каля 4 тыс. еўра — падалася яму прывабнай.

Кошт вырас на тысячу еўра

Першы трывожны сігнал з’явіўся ўжо па прылёце. У аэрапорце Аляксандра ніхто не сустрэў: кансультант-перакладчык, які павінен быў яго суправаджаць, з’ехаў, і камунікаваць з клінікай давялося анлайн. Гэта насцярожыла, але ён вырашыў працягнуць лячэнне, бо паездка ўжо была аплачана.

У самой клініцы высветлілася, што першапачатковы план лячэння змяніўся: спатрэбілася выдаліць яшчэ адзін зуб і ўсталяваць дадатковы імплант. Кошт павялічыўся прыкладна на тысячу еўра.

— Я паспрабаваў запярэчыць, але потым стала зразумела, як гэта працуе: спачатку называюць нізкую цану, а потым павялічваюць яе ўжо на месцы. Ты апынаешся ў сітуацыі, калі адмовіцца цяжка — ты ўжо прыляцеў, выдаткаваў грошы, узяў адпачынак.

Аляксандр пагадзіўся і прайшоў двухтыднёвае лячэнне. Яму абточылі зубы, устанавілі каронкі на ўсе наяўныя зубы, паставілі імпланты і масты. Тры імпланты пакінулі без каронак — для гэтага трэба было вярнуцца праз паўгода.

«Параілі змяніць зубную шчотку і пасту»

Праз некалькі тыдняў пасля вяртання ў Польшчу ў Аляксандра пачаліся праблемы: дзясны пачалі крывавіць, зубы пачалі рэагаваць на халоднае і гарачае.

Ён звязаўся з клінікай, але рускамоўны кансультант ужо не адказваў. Зносіны працягнуліся праз іншага супрацоўніка з дапамогай перакладчыка. У адказ яму параілі змяніць зубную шчотку і пасту.

Клініка прапанавала прыехаць на пераробку. Аляксандр вырашыў сумясціць гэта з устаноўкай каронак на імпланты і дамовіўся вярнуцца праз паўгода.

Адкалоліся пярэднія каронкі

Другі раз Аляксандр ляцеў у Стамбул ужо цалкам за свой кошт: ён аплаціў пералёт, пражыванне і ўсе спадарожныя выдаткі.

Ён успамінае, што юрыдычна сітуацыя ад самага пачатку выглядала непразрыста. Падчас першага візіту ўсю суму трэба было аплаціць наяўнымі. Афіцыйную дамову не заключалі — яму выдалі толькі паперу з сумай і подпісам асістэнта. Тады гэта падалося яму падазроным, але ён не надаў вялікага значэння.

Падчас другога візіту высветлілася, што пасля першага лячэння ў яго адкалоліся пярэднія каронкі, а прыкус заставаўся няправільным.

— У мяне ўжо былі сур’ёзныя праблемы. Я настойваў, каб усё перарабілі па гарантыі.

Паводле яго слоў, у клініцы раней абяцалі гарантыю — два гады на працу і да 20 гадоў на матэрыялы, аднак гэта нідзе не было афіцыйна замацавана.

— Доктар не хацеў перарабляць бясплатна. Пасля доўгіх спрэчак яны пагадзіліся, але з даплатай за каронкі на імпланты.

Аляксандр кажа, што фактычна значную частку лячэння давялося рабіць нанова. Гэты працэс аказаўся цяжкім не толькі фізічна, але і псіхалагічна.

— Я ўжо тады разумеў, што гэта была лекарацкая памылка.

«Лекары проста ў шоку»

Нягледзячы на паўторнае лячэнне, праблемы не зніклі. Паводле слоў Аляксандра, вынік яго не задаволіў ні функцыянальна, ні эстэтычна.

— Мне абяцалі прыгожую ўсмешку, але каронкі дагэтуль выглядаюць ненатуральна. Доктар сказаў, што не можа зрабіць лепш, бо выпадак складаны. Але пра гэта трэба было казаць да лячэння, а не пасля таго, як мне абточылі ўсе зубы.

Вярнуўшыся ў Польшчу, ён звярнуўся ў некалькі клінік, каб атрымаць незалежнае меркаванне.

— Усе прыходзяць прыблізна да аднога і таго ж. Кажуць, што пад карэннямі пакінулі запалёныя ўчасткі — кісты або гранулёмы. Акрамя таго, дзе-нідзе каронкі ўсталяваныя нешчыльна. Ёсць нават імплант, які стаіць пад дзіўным вуглом. Лекары проста ў шоку ад такога падыходу да лячэння.

Пайшлі ўсе назапашанні за тры гады

Першапачаткова Аляксандр разлічваў выдаткаваць каля 4–5 тыс. еўра, аднак у выніку сума лячэння ў Турцыі перавысіла 6 тыс. — без уліку пералётаў і пражывання. На гэта пайшлі амаль усе яго назапашанні за тры гады працы.

Калі ён адправіў у турэцкую клініку заключэнні польскіх лекараў, адказ быў, паводле яго слоў, прадказальным: яму прапанавалі зноў прыязджаць, але без гарантый, што пераробка будзе бясплатнай.

— Я пачаў вывучаць, як можна вырашыць пытанне юрыдычна. Кансуультаваўся з юрыстамі, даведваўся пра суды ў Турцыі. Працэсы могуць цягнуцца гадамі, і рашэнні часта прымаюцца не на карысць замежнікаў. Нават калі выйграеш, кампенсуюць толькі частку шкоды — без уліку пералётаў, пражывання і паслуг адвакатаў.

Паводле яго слоў, паслугі адваката каштуюць ад 1500–1700 еўра на старце, і далей выдаткі толькі растуць.

Аляксандр звярнуўся ў некалькі польскіх клінік па калькуляцыю выдаткаў на лячэнне. Яны вельмі адрозніваюцца — ад некалькіх дзесяткаў тысяч злотых да 172 тыс. у адной з клінік (мужчына прадставіў рэдакцыі MOST медыцынскую дакументацыю). Аляксандр арыентуецца больш чым на 100 тыс. злотых. Пры гэтым даход у беларуса невялікі: яго ледзь хапае на арэнду жылля і базавыя выдаткі.

Аляксандр кажа, што спрабаваў звярнуцца ў розныя фонды, каб адкрыць збор сродкаў, але атрымаў адмову. Таму ён распавядае пра збор у сябе ў Facebook.

«Клініка насамрэч нібыта не існуе»

Спробуючы разабрацца ў сітуацыі, Аляксандр пачаў самастойна шукаць інфармацыю пра клініку.

Паводле яго слоў, ён высветліў, што яна магла працаваць не зусім легальна. Ён публікаваў сваю гісторыю на турэцкіх інтэрнэт-пляцоўках, указваў назву клінікі і спасылкі на яе старонкі ў сацыяльных сетках — так яму ўдалося знайсці дадатковыя кантакты.

У пэўны момант ён выйшаў на будынак, дзе праходзіла лячэнне, аднак там яму паведамілі, што да гэтай клінікі не маюць прамога дачынення.

— Тады ў мяне склалася ўражанне, што гэта можа быць махлярская схема. Яны актыўна рэкламуюцца, публікуюць прыгожыя ролікі і водгукі, але пры гэтым не заўсёды маюць дазвол на медыцынскі турызм.

Аляксандр сцвярджае, што ў клінікі не было ўласнага памяшкання — яна арандавала кабінет у іншым медыцынскім цэнтры і працавала пад іншай назвай.

— Я звярнуў увагу, што нас, замежных пацыентаў, прымалі на ніжнім паверсе, не напаказ. А мясцовыя лячыліся на першым паверсе, дзе вокны выходзяць на вуліцу. Зараз гэтай клінікі там ужо няма — яны з’ехалі.

Клініка пачала пагражаць судом

Знайсці лекара, які праводзіў лячэнне, Аляксандру таксама не ўдалося: той, паводле яго слоў, перайшоў у іншую клініку і перастаў выходзіць на сувязь.

— Я спрабаваў звязацца з ім праз новае месца працы, але не ўпэўнены, што яму наогул перадалі інфармацыю. Яны, хутчэй, падтрымліваюць адзін аднаго.

Акрамя таго, калі ў клініцы даведаліся, што былы пацыент распаўсюджвае сваю гісторыю, — беларусу пачалі пагражаць судом.

— Казалі, што я паклёпнічаю і псую рэпутацыю. Але я проста распавядаю, што са мной адбылося.

«Шмат чаго я даведаўся ад былой супрацоўніцы»

Частку інфармацыі пра працу клінікі Аляксандр атрымаў ад яе былой супрацоўніцы. Так ён даведаўся, што клініка, у якой ён лячыўся, магла працаваць пад іншай назвай і не мець уласнага памяшкання.

— У іх шмат старонак у Facebook на розных мовах — турэцкай, англійскай, рускай, арабскай. Яны спрабуюць ахапіць розную аўдыторыю і прыцягваюць людзей прыгожымі ролікамі і, як мне падаецца, інфармацыяй, што ўводзіць у зман.

Пры гэтым Аляксандр падкрэслівае: вонкава вынік лячэння можа выглядаць лепш, чым было першапачаткова, але гэта не адлюстроўвае рэальнага стану.

— Я выбіраў дарагія матэрыялы — дыяксід цырконію, хацеў добрую ўсмешку і ўклаў у гэта ўсе свае грошы. Таму на фота гэта можа выглядаць нядрэнна. Але па факце гэта толькі вонкавы эфект, а праблемы засталіся.

«Абароніць свае правы будзе вельмі складана»

Атрымаўшы такі досвед, Аляксандр зрабіў для сябе некалькі высноваў.

— Не варта давяраць водгукам у інтэрнэце. Іх могуць пісаць адразу пасля лячэння, калі яшчэ не відаць наступстваў. Людзі публікуюць прыгожыя фатаграфіі і відэа, але невядома, як сітуацыя будзе развівацца з цягам часу.

Ён раіць загадзя правяраць рэпутацыю лекараў, удакладняць, якія дакументы мае клініка, якое абсталяванне выкарыстоўваецца, і абавязкова патрабаваць дамову.

— І важна разумець: калі нешта пойдзе не так, абараніць свае правы будзе вельмі складана, — рэзюмуе суразмоўца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]