У Вялікабрытаніі выпусцілі пустую кнігу
2- 10.03.2026, 22:32
- 1,090
І ў яе сур’ёзны пасыл.
Каля 10 тыс. брытанскіх пісьменнікаў, у тым ліку лаўрэата Нобелеўскай прэміі Кадзуо Ісігуро і аўтарку гістарычных раманаў Філіпу Грэгары, аб’ядналіся дзеля незвычайнага пратэсту.
Яны выпусцілі кнігу… без аніводнага слова. Выданне пад назвай Don’t Steal This Book («Не крадзі гэту кнігу») утрымлівае толькі спіс імёнаў удзельнікаў акцыі, паведамляе выданне downthetubes.net.
Пустыя старонкі — не мастацкі прыём, а маніфест. Пісьменнікі выступаюць супраць выкарыстання іх твораў для навучання штучнага інтэлекту без дазволу і захавання аўтарскіх правоў.
Тэхналагічныя кампаніі ўсё часцей загружаюць у нейрасеткі тэксты, абароненыя аўтарскім правам, і аўтары патрабуюць гэта спыніць.
Падставай для акцыі сталі запланаваныя змены ў брытанскім заканадаўстве. Новыя нормы могуць дазволіць ІТ-гігантам свабодны доступ да абароненых твораў, калі праваўладальнік загадзя не заявіў пра сваю нязгоду.
Па сутнасці, аўтараў хочуць прымусіць актыўна «адмаўляцца», а не даваць згоду.
Кампазітар і актывіст Эд Н’ютан, ініцыятар праекта, патлумачыў сваю пазіцыю так: генератыўныя мадэлі ШІ навучаюцца на працах жывых аўтараў, а потым канкурыруюць з імі, пазбаўляючы заробку.
Ён заклікаў урад абараніць творчы сектар і не дапусціць легалізацыі бескантрольнага выкарыстання чужой інтэлектуальнай працы.
Праблема не прыдуманая. У 2025 годзе амерыканская кампанія Anthropic, распрацоўшчык ШІ, выплаціла $1,5 млрд, каб урэгуляваць калектыўны пазоў за выкарыстанне незаконных капіяў аўтарскіх твораў пры навучанні нейрасетак.
Таму пустая кніга брытанскіх пісьменнікаў — гэта гучны сігнал. І ён адрасаваны не толькі чытачам, але і заканадаўцам.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
