Польскі генерал: Ту-95МС, што разбіўся ў Расіі, мог быць датычны да ўдару па Польшчы

Ідзе гаворка пра ракету, якая 30 ліпеня выбухнула ў Люблінскім ваяводстве.

Аператыўны камандуючы родамі войскаў Узброеных Сіл Польшчы генерал Ірэнеуш Новак паведаміў, што стратэгічны бамбавік Ту-95МС, які нядаўна разбіўся ў Расіі, раней мог быць датычны да ўдару паблізу Тарнавы.

Самалёт разбіўся 29 верасня на Далёкім Усходзе РФ, пры гэтым загінуў экіпаж з шасці чалавек. Ірэнеуш Новак адрэагаваў на гэтую навіну, заявіўшы, што менавіта гэты Ту-95МС мог быць носьбітам крылатай ракеты Х-101, якая раней атакавала Польшчу. Сваю рэакцыю польскі генерал апублікаваў на сваёй старонцы ў сетцы X.

«Магчыма, менавіта гэты самалёт нёс ракету Х-101, якая завяршыла палёт паблізу Тарнавы», — коратка адзначыў Новак.

Паводле звестак выдання «Wiadomosci», ідзе гаворка пра ракету, якая 30 ліпеня, перасякаючы польскую мяжу, выбухнула паблізу вёскі Тарнава-Калонія ў Люблінскім ваяводстве.

«Акт адплаты» ці выпадковасць?

Пасля гэтага паведамлення польскага генерала, які рэдка робіць публічныя заявы з нагоды падобных інцыдэнтаў, з’явіліся версіі, што крушэнне расійскага бамбавіка магло адбыцца «не проста так». Сам Новак у каментары выданню адмовіўся ўдавацца ў падрабязнасці і патлумачыць свае словы больш канкрэтна.

«Я гэта не каментую. Гэта быў асабісты пост, без якога-небудзь больш глыбокага кантэксту. Нам і так хапае сенсацый», — падкрэсліў ён.

Іншы высокапастаўлены польскі вайсковец, былы кіраўнік Ваеннай разведкі, брыгадны генерал Марэк Лапіньскі адзначыў, што «калі б нашы службы мелі такія магчымасці і скарысталіся імі, мы былі б сапраўднымі ідыётамі, калі б якім-небудзь чынам гэта пацвердзілі».

Былы камандзір Цэнтра паветраных аперацый, генерал-палкоўнік авіяцыі Славамір Дыгнатаўскі, са свайго боку, заявіў, што Аператыўнае камандаванне Узброеных Сіл магло проста мець дакладныя даныя пра тое, што менавіта гэты самалёт у ліпені падымаўся ў паветра для абстрэлу Украіны. Ён дадаў, што за гэтым неабавязкова павінны стаяць нейкія тэорыі ці сакрэтныя аперацыі.

«Няма нічога сенсацыйнага ў тым, што гэты самалёт, так бы мовіць, нарэшце назаўсёды «прыпаркаваўся» на зямлі. Але мы з вялікім задавальненнем успрынялі гэтую інфармацыю і чакаем працягнення», — заявіў Дыгнатаўскі.

Ён таксама патлумачыў, што падчас кожнага вылету такога самалёта вывучаецца яго маршрут, каб вызначыць, што можа стаць патэнцыйнай мішэнню абстрэлу. У такіх выпадках Польшча абапіраецца на даныя саюзнікаў, каб даволі дакладна вызначыць ўчасткі, якія могуць падпасці пад атаку, а таксама накірункі атакі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]