Расійскі рэжысёр Сакураў у твар раскрытыкаваў Пуціна

Відэафакт.

Вядомы расійскі рэжысёр Аляксандр Сакураў выступіў перад Пуціным на пасяджэнні Савета па развіцці грамадзянскай супольнасці і правах чалавека. Ён падняў тэму «інаагентаў», праблем у расійскіх ВНУ, росту тарыфаў і цэнзуры, гаворыцца ў матэрыяле «Новая газета Еўропа».

Падчас свайго выступу Сакураў якраз адзначыў, што ў Савеце прынята пазбягаць палітычных пытанняў, якія патрабуюць грамадскага абмеркавання.

Пасля гэтага рэжысёр закрануў тэму адукацыі ў Расіі. Сакураў распавёў, што нядаўна вярнуўся з Італіі, дзе наведаў некалькі ўніверсітэтаў, і атрымаў натхняльнае ўражанне ад студэнцкага асяроддзя. Ён прызнаў, што ў Еўропе ёсць цяжкасці ў адукацыйнай сферы, аднак адзначыў, што ў Расіі сітуацыя не лепшая: «Многія мае знаёмыя, у якіх дзеці мусяць паступаць у вышэйшыя навучальныя ўстановы, з трывогай глядзяць на некаторыя лічбы. Напрыклад, на тое, што дзеці вайскоўцаў, якія знаходзяцца на фронце, атрымліваюць усе перавагі пры паступленні ў ВНУ. Палітычна мне гэты крок зразумелы. Але з пункту гледжання якасці адукацыі, мне здаецца, тут трэба аднавіць пэўны баланс, бо колькасць бюджэтных месцаў рашуча скарацілася».

Ён адзначыў, што плаціць за адукацыю па 200, а то і па 400 тысяч рублёў на год становіцца немагчыма. Сакураў падкрэсліў, што ў таленавітых і разумных маладых людзей усё менш шанцаў атрымаць бясплатную вышэйшую адукацыю.

У адказ Пуцін заявіў, што за мяжой адукацыя ўсё адно даражэйшая, а рашэнне аб ільготах для дзяцей удзельнікаў так званай «СВА» было правільным.

Сакураў распавёў Пуціну, што ў сённяшняй Расіі няма культуры палітычных дыскусій і што ціск цэнзуры ўплывае ў тым ліку на працу творчых дзеячаў.

«Мы не ўмелі і не ўмеем весці палітычныя дыскусіі з маладымі людзьмі, са старшакласнікамі, са студэнтамі. У краіне баяцца гэтых дыскусій. Адсутнасць працэдуры палітычных дыскусій, адсутнасць працэдуры адкрытага абмеркавання працэсаў, якія адбываюцца ў краіне, адсутнасць абмеркавання сур'ёзных апазіцыйных настрояў, на мой погляд, наносіць вельмі сур'ёзны ўдар па лёсах многіх таленавітых людзей», — падкрэсліў рэжысёр.

Улады пастаянна ціснуць на супрацоўнікаў самых розных творчых сфер, уключаючы кіно, літаратуру і нават кніжны гандаль, адзначыў Сакураў. З-за гэтага, паводле слоў рэжысёра, многія не могуць рэалізаваць свае задумы і проста губляюць магчымасць працаваць па спецыяльнасці: «Вельмі часта гэтым людзям не тлумачаць, чаму з імі абыходзяцца жорстка і бескампрамісна. Мне, напрыклад, кажуць, закрываючы мой фільм: «Ідзі да свайго прэзідэнта, абмяркоўвай». (Стараюся даведацца), што, якая прычына забароны паказу фільма? Без тлумачэння прычын».

Сакураў узгадвае, што ў СССР хаця б тлумачылі прычыны забаронаў. Разам з тым ён падкрэсліў, што спробы той ці іншай дзяржавы душыць мастацтва ніколі не вытрымлівалі выпрабавання часам.

«Мастацтва дзяржаве неабходнае. Няправільна атрымліваецца так, што дзяржава нападае на свайго грамадзяніна», — падкрэсліў Сакураў.

Па яго словах, «у многіх мастацкіх ВНУ ў людзей апушчаныя галовы», таму што ім усё забараняюць: «Паспрабуйце сёння зняць «Баладу пра салдата» (выпушчаны ў 1959 годзе фільм Грыгорыя Чухрая). Неадкладна будзе забаронены фільм, а што будзе з гэтым аўтарам — таксама невядома. Атрымае ён далей магчымасць працаваць ці не — таксама не ясна. Гэта прынцыпова важная сітуацыя. Трэба рашуча мяняць атмасферу, узаемаадносіны дзяржавы з мастацкім асяроддзем, з маладымі людзьмі. Калі ў нас не зменіцца гэты характар працы з маладымі людзьмі, мы далёка не зойдзем. Гэта будзе абсалютны тупік, рэгрэс усёй дзяржаўнай сістэмы».

Пуцін у адказ сказаў Сакураву, што ў дзяржавы заўсёды былі складаныя адносіны з мастацтвам, і дапусціў, што «Баладу пра салдата» сёння таксама выпусцілі б з-за тэматыкі любові да Радзімы і маці.

Ён таксама паабяцаў Сакураву абмеркаваць забароны прац рэжысёра асабіста, то бок у абыход рашэнняў Мінкульта пра адсутнасць пасведчання, якое дазваляе легальна паказваць фільмы пастаноўшчыка на тэрыторыі Расіі. «Я патэлефаную, пагаворым», — сказаў Пуцін і назваў забароны Сакурава ў РФ «дзіўнымі».

«Звяртаю вашу ўвагу, што вы з'яўляецеся членам СПЧ пры прэзідэнце, таму ніякай дыскрымінацыі ў адносінах да вас не дапускаецца. Ва ўсякім разе, на такім узроўні. Але калі ёсць нейкія абмежаванні і вы іх бачыце, скажыце мне», — дадаў Пуцін.

На наступны дзень Сакураў заявіў журналістам, што цяпер спадзяецца на сустрэчу з Пуціным, але пры гэтым асцерагаецца наступстваў свайго выступлення. Паводле яго меркавання, яно магло не спадабацца кагосьці ў «бюракратычным асяроддзі», кіраўніку «Першага канала» Канстанціну Эрнсту і Міністэрству культуры ў цэлым.

«Яны, напэўна, з вялікай трывогай глядзелі на тое, што прэзідэнт увогуле слухаў гэтую размову і ў прынцыпе прыняў гэтую трывогу», — выказаў здагадку рэжысёр.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]