Яхта Пуціна тэрмінова адправілася ў Арктыку

Пасля серыі паспяховых удараў украінскіх беспілотнікаў.

Суперяхта Graceful, якую заходнія СМІ звязваюць з расійскім дыктатарам Уладзімірам Пуціным, пакідае еўрапейскія воды і накіроўваецца ў расійскі Мурманск. Паводле дадзеных The Telegraph, судна рухаецца пад узмоцненай аховай расійскіх ваенных караблёў на фоне апасенняў новых атак украінскіх дальнабойных беспілотнікаў.

Выданне са спасылкай на даныя марской разведкі і спадарожнікавыя здымкі паведамляе, што 82-метровая яхта ідзе ўздоўж узбярэжжа Нарвегіі, а яе маршрут знаходзіцца пад наглядам краін НАТА.

Судна суправаджаюць вялікі супрацьлодкавы карабель «Североморск» і патрульна-выратавальнае судна «Воевода». Пры гэтым палубу яхты закрылі спецыяльнымі антыдронавымі сеткамі.

Крыніца ў НАТА паведаміла выданню, што падчас праходжання праз Балтыйскае мора канвой кантралявалі ваенна-марскія сілы Нямеччыны і Даніі.

Паводле дакументаў ураду ЗША, Пуцін неаднаразова карыстаўся яхтай «Graceful», у прыватнасці падчас падарожжа па Чорным моры ў 2021 годзе разам з кіраўніком Беларусі Аляксандрам Лукашэнкам.

Пасля пачатку поўнамаштабнага ўварвання Расіі ва Украіну яхту вывелі з нямецкай верфі ў Калінінград, а пасля ЗША ўключылі судна ў санкцыйны спіс. Пасля гэтага яго, паводле СМІ, перайменавалі ў «Касатку».

Украінскія ўдары прымусілі Крэмль узмацніць меры бяспекі

The Telegraph звязвае перамяшчэнне яхты з нядаўнімі ўдарамі ўкраінскіх беспілотнікаў па расійскіх ваенна-марскіх аб'ектах.

На мінулым тыдні ўкраінскія дроны далёкага дзеяння атаквалі базу Кранштадт у Фінскім заліве, дзе, паводле паведамленняў, быў пашкоджаны карвет «Бойкий». Спадарожнікавыя здымкі таксама сведчаць пра значнае скарачэнне колькасці караблёў у гавані пасля атак.

Былы аташэ Вялікабрытаніі па пытаннях абароны ў Маскве Джон Форман лічыць, што Крэмль імкнецца максімальна забяспечыць бяспеку дарагавартасных актываў:

«Яны не хочуць рызыкаваць. Адводзяць яго далей ад украінцаў пасля таго, як тыя разграмілі Кранштадт».

Ваенна-марскі эксперт Эма Солсберы таксама лічыць, што суправаджэнне яхты баявымі караблямі сведчыць пра нежаданне Крамля дапусціць які-небудзь інцыдэнт з суднам. Кошт яхты ацэньваецца больш як у 130 млн долараў.

Пуцін узмацняе ўласную ахову

Паводле выдання, апошнім часам расійскі прэзідэнт значна ўзмацніў меры бяспекі вакол сябе.

У прыватнасці, была павялічана колькасць супрацоўнікаў Федэральнай службы аховы, якая адказвае за бяспеку Пуціна і членаў яго сям'і. Супрацоўнікам, якія маюць непасрэдны доступ да кіраўніка Крамля, забаронена карыстацца прыладамі з доступам у інтэрнэт, а ў месцах пражывання персаналу ўсталяваныя сістэмы назірання.

Акрамя таго, як адзначае The Telegraph са спасылкай на расследаванне «Радыё Свабода», рэзідэнцыю Пуціна на возеры Валдай акружылі шматлікія вежы з зенітнымі комплексамі «Панцыр».

Выданне таксама адзначае, што Graceful стала ўжо другой яхтай, якую звязваюць з Пуцінам і якая пакідае еўрапейскі напрамак. Раней у турэцкі Бодрум адправілася іншая шыкоўная яхта — Victoria, якую журналісты таксама звязваюць з найбліжэйшым асяроддзем расійскага кіраўніка.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]