Турагентка зняла з беларусаў «ружовыя акуляры», апублікаваўшы «рэальныя цэны» на адпачынак

У сацсетцы ўспыхнулі спрэчкі.

Камфортны адпачынак на моры для беларускай сям'і з двух дарослых і аднаго дзіцяці будзе каштаваць у залежнасці ад краіны і харчавання ад 3800 даляраў. Такімі разлікамі падзялілася ў Threads супрацоўніца турагенцтва Indigo Travel Марта. Не ўсе карыстальнікі сацсеткі з ёй пагадзіліся, піша «Zerkalo».

Турагентка адзначыла, што сваім допісам хацела зняць з беларусаў «ружовыя акуляры» і «апусціць на зямлю» ў пытаннях, якія датычацца адпачынку на моры, а таксама «шчыра» пагаварыць «пра рэальныя цэны на лета». Для сваіх разлікаў аўтарка публікацыі ўзяла самы часты запыт: пуцёўку для сям'і з двух дарослых і аднаго дзіцяці на дзесяць начэй у ліпені—жніўні.

«Ніякага люксу, проста нармальныя гатэлі», — напісала Марта, дадаўшы, што прынцыпова не браніруе «самы танны трэш дзеля галачкі».

Адпачынак у Грузіі, паводле падлікаў турагенткі, будзе каштаваць у гэтым сезоне ад 3800 даляраў. У кошт уключаны толькі сняданкі. За Егіпет і Турцыю па сістэме «ўсё ўключана» давядзецца аддаць ад 4000 даляраў. В'етнам абыдзецца ў 4500 даляраў (толькі сняданкі) і ад 5500 даляраў за поўны пансіён.

«Далей танней ужо дакладна не будзе, месцы на рэйсах таюць. Глядзім на рэчы цвяроза і плануем проста цяпер», — параіла аўтарка допісу.

Допіс Марты за амаль суткі сабраў больш за 85 тысяч праглядаў і звыш 180 каментарыяў. Некаторыя пагадзіліся, што папулярныя турыстычныя напрамкі, якія раней лічыліся бюджэтнымі, ужо зусім не танныя.

«Дзякуй, Марта. Я меншых лічбаў і не чакаў у гэтым годзе!» — адзначыў bortkevich.igor83.

«Цэны палохаюць і засмучаюць… Асабліва настальгуюць тыя, хто памятае сціплую Турцыю з Масквы ў дзесяць разоў танней гадоў 15 таму… Таму адмовіліся ад Турцыі і Егіпта ўлетку», — напісала akme.1981.

Іншыя палічылі прыведзеныя турагенткай цэны завышанымі:

«Для Турцыі, Егіпта і Грузіі гэта касмічныя цэны за проста нармальныя гатэлі», — падзялілася меркаваннем a_lenushk__a.

«Зараз едзем у Турцыю на два тыдні самі: Стамбул, Кемер, Каш, на чатырох дарослых 5000 даляраў», — распавяла anni_in_woonderland.

«Ну Грузія нашай сям'і абышлася ў 3400 даляраў (толькі сняданкі). Сям'я 3+1. Дык вы яксьці занадта крута яе палічылі. Гатэль не трэшавы, проста нармальны», — падзялілася irina_savanchuk.

Некаторыя пачалі дзяліцца лайфхакамі па арганізацыі падарожжаў:

«Беларусы, зноў надзяваю вам акуляры. Набываеце квіткі ў В'етнам самастойна ў «Белавія» на траіх за 2700 даляраў і браніруеце на сайце trip.com добры гатэль у цэнтры за 500 даляраў са сняданкам», — параіла julia_kir_ko.

«Албанія: квіткі 100 даляраў з чалавека туды-адтуль з Варшавы, гатэль, хай і люксавы, 100 даляраў за суткі. Разам 1300 даляраў на дзесяць начэй», — распавёў пра свой досвед ukanboy.

А карыстальнік canary_mnsk параіў звярнуць у гэтым сезоне ўвагу на Мадэйру, Тэнерыфэ і Майёрку, дзе «шмат выдатных віл з уласнымі басейнамі, саунамі ў бюджэце 1500—2000 еўра на дзесяць начэй». Каментатар таксама прывёў свае разлікі адпачынку на Мадэйры ў 2025 годзе на двух чалавек. Пражыванне ў вілі абышлося ім у 2000 еўра за 13 начэй, ежа ў рэстаранах каштавала 700—800 еўра. Яшчэ 300 еўра аддалі за арэнду Porsche 911 на чатыры дні і 150 еўра — за бензін. За прадукты двое адпачывальнікаў выклалі каля 200 еўра. На іншыя дробязі — яшчэ 200 еўра. Квіткі на самалёт, дарога да Варшавы і назад (з паркоўкай, палівам, страхоўкай і зборамі), а таксама візы — 500 еўра.

«Разам прыблізна 4000 еўра», — напісаў canary_mnsk.

Карыстальнік deni_founder распавёў пра свой адпачынак у Барселоне. У сталіцу Каталоніі ён прыляцеў з Варшавы. Квіткі каштавалі 200 еўра на дваіх у адзін бок. Кватэру «ў Гатычным квартале» пара зняла за 150 еўра за суткі.

«Тыя ж цэны або ніжэй будуць у Ніцы, Канах, Валенсіі, Рыміні, Неапалі, Лімасоле. У Харватыі, Грэцыі, Славеніі. Адтуль пералёт у Турцыю будзе каштаваць 100 еўра з чалавека. Як можна ў ААЭ або Егіпет ехаць у 35—40 градусаў улетку, я ўвогуле не ўяўляю, там нават вецер гарачы, на вуліцу з 09:00 да 18:00 выйсці немагчыма», — здзівіўся deni_founder.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]