«Адгукнуўся на 95% аб'яў — і ўсе адмовілі»
3- 30.05.2026, 21:02
- 2,352
Расіяніну не хочуць здаваць кватэру ў Гродне.
Беларус, які дапамагае стрыечнаму брату з Расіі знайсці кватэру ў Гродне на працяглы тэрмін, сутыкнуўся з татальным нежаданнем гродзенцаў здаваць жыллё расіянам, піша НН.
«Што наогул адбываецца з арэндай жылля ў РБ для замежных грамадзян (РФ)? Я адгукнуўся на 95% аб'яў Гродна, і ўсе адмовілі», — напісаў мужчына ў Трэдс.
У арэндзе жылля расіянам адмаўляюць. Прычыны называюць розныя
Адзін з каментатараў тлумачыць гэта тым, што здаць жыллё замежніку па дамове азначае атрымаць масу праблем. Напрыклад, з выплатай падатку, калі гэты арэндар вырашыць з'ехаць, не папярэдзіўшы.
«Вы павінны будзеце ў судзе даказваць, што ў вашай кватэры ніхто не жыве! І ўсе гэтыя месяцы, пакуль нейкім немагчымым спосабам не дакажаце, будзеце плаціць падатак! І не зможаце здаць іншым людзям. А без дамовы на сумленным слове здаць — увогуле не варыянт», — тлумачыць адзін з каментатараў.
«Ім абавязкова трэба рэгістраваць здачу жылля замежным грамадзянам. Не хочуць замарочвацца», — дадае іншы.
На гэта аўтар паста адказаў, што толькі сёння адправіў заяўкі больш чым на 50 кватэр, і большасць успрымае рэгістрацыю як упісванне невядомага чалавека ў сваю ўласнасць, таму і адмаўляюцца.
«Хтосьці проста паводле чутак наогул не хоча здаваць. Паспартысты ў цэлым раяць не звязвацца з РФ», — піша ён.
Яшчэ адзін каментатар дзеліцца, што ў міліцыі не раяць звязвацца з расіянамі, нібыта кажуць, што лепш засяляць в'етнамцаў або кітайцаў, бо з імі менш праблем.
Расіяне самі вінаватыя, што іх недалюбліваюць?
Пры гэтым многія адзначаюць, што нежаданне здаваць жыллё расіянам можа быць выклікана не толькі бюракратычнымі пытаннямі.
«У Гродне не любяць рускіх. Вось і ўвесь адказ», — гучыць адзін з самых залайканых каментароў.
«Заўсёды ведаў, што ў Гродне жывуць самыя цудоўныя людзі, так трымаць! Мы, мінчане, не такія», — іранізуе іншы.
«Ай, малайцы, землякі, ганаруся», — піша мужчына.
Ёсць і тыя, хто лічыць, што расіяне самі вінаватыя ў сітуацыі, што склалася.
«Так адбываецца, таму што вельмі многія расіяне паводзяць сябе ў краіне вельмі кепска і заслужылі сабе ашаламляльную рэпутацыю», — напісала жанчына.
Пры гэтым знайшлася жанчына, якая шмат гадоў здае кватэру расіяніну, і ў яе з гэтым няма праблем.
«Здаю кватэру мужчыну з Казані ўжо больш за 7 гадоў, усё па дамове і па законе, ніякіх праблем няма», — напісала яна і дадала, што абавязкова трэба рабіць рэгістрацыю ў ЖЭСе з афармленнем дамовы, а затым рэгістрацыю ў міліцыі ў ўчастковага і выплачваць падатак.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
