Караева «пакусаў» Лукашэнка
9- 16.04.2026, 21:08
- 4,142
Кіраўнік Гродзенскай вобласці «ўключыў» рэжым калгаснага дыктатара.
Кіраўнік Гродзенскай вобласці, былы памочнік Аляксандра Лукашэнкі і экс-міністр унутраных спраў Юрый Караеў днямі інспектаваў сельскагаспадарчыя арганізацыі Воранаўскага раёна. Нарэзка відэа пра гэтую падзею з'явілася ў TikTok аблвыканкама. Большасць каментатараў у гэтай сацсетцы выказалася пра мерапрыемства з удзелам генерала іранічна — у прыватнасці, параўнаўшы манеру яго паводзінаў з падобнымі візітамі Лукашэнкі. «Зеркало» распавядае, у чым была справа.
Ролік пачынаецца з таго, як Юрый Караеў ідзе па ферме з віламі ў руках. Потым ён ужо паднімае плёнку з запоўненай сіласнай ямы. Яна, дарэчы, прыціснутая аўтамабільнымі шынамі.
— Не вельмі герметычна закрыта. Во там трошкі паветра падзьмявае чамусьці. Не прыціснулі. Гэта ж бачна няўзброеным вокам, — крытыкуе кіраўнік Гродзенскага аблвыканкама.
На наступных кадрах экс-міністр унутраных спраў ужо раздае каманды каля сіласнай ямы.
— Апусціць, пакласці, выраўнаваць, акультурыць гэта месца. Пакрышкі не павінны вось так у брудзе валяцца. Вось гэтую выбоіну, кавалак, зараўняць, — адрывіста кажа былы сілавік.
У відэа — 588,7 тысячы праглядаў. Пад ім — 270 каментарыяў. Пераважна іранічна-негатыўныя.
Так, частка карыстальнікаў адразу адзначыла, што Юрый Караеў паводзіць сябе на ферме, як Аляксандр Лукашэнка: падчас візітаў на прадпрыемствы гэты палітык таксама часта раздае дэталёвыя ўказанні і агучвае крытычныя заўвагі нават па дробязях.
Вось што пішуць пра манеру Караева каментатары:
«Пародыя на Лукашэнку — смешна!»
«Будучы прэзідэнт РБ, трэніруецца».
«Хутчэй, Гайдукевіч будзе: ён бліжэй па поглядах на жыццё ў Беларусі».
«У яго таксама шмат прафесій, як і ў яго начальніка».
«Міні-Лукашэнка?»
«Нешта знаёмае, дзесьці я гэта бачыў».
Частка каментатараў скептычна паставілася да заўваг Караева аграрыям, успамінаючы ягонае мінулае ў шэрагах сілавікоў. Нагадаем, ён служыў у спецназе і ўнутраных войсках. А з 2009 года рабіў кар’еру ў кіраўніцтве МУС: з 2012 па 2019 год быў намеснікам міністра і ўзначальваў унутраныя войскі. А з кастрычніка 2019-га па кастрычнік 2020-га працаваў міністрам унутраных спраў — на перыяд яго кіраўніцтва ведамствам прыйшліся самыя масавыя ў гісторыі краіны пратэсты і іх сілавое падаўленне, прычым некаторыя пратэстоўцы загінулі. Даслужыўся да звання генерал-лейтэнанта міліцыі.
«А што без дубінкі?»
«Калгаснік можа стаць ментам, але мент калгаснікам — не!»
«Ніхто так не ведае сельскую гаспадарку, як генерал».
«Дзіўна, чаму старшыня калгаса ў гэтым не разбіраецца, што яму мент падказвае».
«А калі не зараўняюць — на рынг старшыню: тры па тры хвіліны, спарынг. Так?»
«У духу часу: менты ва ўсіх сферах эканомікі — такія прафесары. А казалі: адна звіліна, і тая ад фуражкі».
Шмат хто скептычна ацаніў заўвагі кіраўніка Гродзенскай вобласці, адзначаючы, што ў Караева няма спецыяльнай адукацыі і досведу працы ў сельскай гаспадарцы. Маўляў, гэта праца на камеру і для карцінкі — так зможа любы беларус.
«Мне цікава, а што гэты персанаж разумее ў сельскай гаспадарцы, калі раней ён бачыў яе толькі на карцінках?»
«Галоўнае — паказацца, каб людзі падумалі, што разбіраецца».
«А адкуль ён можа ведаць тэхналогію закладкі кармоў?»
«Калі б міністр быў на месцы дырэктара, дык даведаўся б, што да чаго і як насамрэч ідуць справы ў сельскай гаспадарцы…»
«Нічога добрага не будзе — будзе, як заўсёды, паказуха. А за шырмай зусім іншае жыццё ў Беларусі».
«Будзем так і жыць, пакуль кожны не будзе на сваім месцы, а гэта ўсё — папулізм».
«Ён ні ў чым не разбіраецца: праца на камеру і для начальства».
«Галоўнае — зрабіць разумны выгляд, і выбоіна вырашыць усе праблемы сельскай гаспадаркі».
«Любы чалавек так бы змог. Я б за такі заробак, як у іх, напэўна, штодзень бы правяраў».
«Думаю, так палова краіны змагла б праінспектаваць».
«А яшчэ я там убачыў: сценку трэба пафарбаваць! Усё, плаціце мне зарплату Караніка» (каментатар пераблытаў экс-кіраўніка Гродзенскай вобласці Уладзіміра Караніка і цяперашняга старшыню Гродзенскага аблвыканкама Юрыя Караева. — Заўв. рэд.).
«Дакладна сказана, асабліва пра выбоіну: кавалак зараўняць — каровам адразу лягчэй стане».
«Вялікі ўраўняльнік. Адразу стане жыць лепш нам… паказуха».
«Карціна з віламі — гэта ўвогуле супер: ён нават не ведае, з якога боку да іх падысці».
«Каманды даваць лёгка, а паспрабуй іх выканаць, ды яшчэ калі людзей не хапае».
Частка каментатараў крытыкуе саму сітуацыю, называючы абсурдным тое, што кіраўнік аблвыканкама ўвогуле прыехаў інспектаваць ферму:
«Я аднаго не разумею: няўжо ў кіраўніка вобласці няма стратэгічных задач — толькі інспектаваць сіласныя ямы? Навошта столькі чыноўнікаў у раёнах і ў самой гаспадарцы?»
«Проста няма культуры і сістэмы кіравання… І гэта ў Гродзенскай вобласці, дзе ўсё ў ідэальным парадку».
«Якія каштоўныя ўказанні для сельскай гаспадаркі: апусціць, закласці, выраўнаваць, акультурыць...»
«Навошта гэтая імітацыя бурнай дзейнасці?»
«Сто камісій прыехала, каб паказаць на яму».
«Да таго, як паказалі пальцам, яны не ведалі?»
«У краіне дарогі ў жахлівым стане, а ён выбоіну знайшоў на ферме».
«А навошта там тады старшыня калгаса, калі губернатар прыязджае і пальцам усё паказвае, што трэба зрабіць?»
«Мда, і гэта нашы чыноўнікі».
«Якія ў нас універсальныя кіраўнікі — ва ўсім разбіраюцца».
«Калі будзеце бульбу перабіраць, таксама яго паклічце!»
Нагадаем, Аляксандр Лукашэнка зняў Юрыя Караева з пасады памочніка па Гродзенскай вобласці 3 сакавіка 2025 года (гэту пасаду апошні займаў амаль тры з паловай гады). А ўжо 31 сакавіка палітык прызначыў яго старшынём Гродзенскага аблвыканкама. Караеў змяніў на пасадзе Уладзіміра Караніка — былога міністра аховы здароўя.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
