Аляксандр Каваленка: Любы трэцякласнік абвергне гэты маразм Крамля

Што стаіць за істэрыкай Патрушава?

Крэмль узяўся абвінавачваць краіны Балтыі і Фінляндыю ў тым, што яны нібыта дапамагаюць Украіне наносіць удары па расійскіх ваенных аб’ектах, прадастаўляючы сваю паветраную прастору для пралёту ўкраінскіх дронаў. Пра гэта заявіў памочнік Пуціна Мікалай Патрушаў.

Сайт Charter97.org папрасіў украінскага ваенна-палітычнага аглядальніка групы «Інфармацыйны супраціў» Аляксандра Каваленку пракаментаваць гэтыя дзіўныя заявы:

— Па-першае, Патрушаў — гэта чалавек, які рабіў рознага кшталту заявы, што ў далейшым наогул не адпавядалі рэчаіснасці. І парой нават расійская афіцыйная інфармацыя, якая публікавалася пазней, цалкам супярэчыла яго выказванням. Нагадаю яго заявы адносна дачынення Украіны да тэрарыстычных актаў у «Крокусе», да якіх Кіеў увогуле не меў ніякага дачынення. У далейшым расійскае ж расследаванне гэта і пацвердзіла. Наколькі б «высокапастаўлены прадстаўнік», прадстаўнік «паважанай» спецструктуры ні быў, па сутнасці, ён цытаваў і рэтрансляваў фэйкі, маніпуляцыі, а не пацверджаную і вэрыфікаваную інфармацыю.

Патрушаў на сёння ператварыўся ў гаворачую галаву, якой неабходна нечым напаўняць інфармацыйную прастору ў Расіі, каб спажыўцы інфармацыйнага фастфуду ў РФ усё гэта елі і верылі гэтаму. Аднаго толькі Нарышкіна ўжо недастаткова. Адной толькі Службай знешняй выведкі РФ яны не могуць абысціся.

— Па-другое, такім чынам Расія спрабуе апраўдаць няздольнасць сваіх сістэм супрацьпаветранай абароны прадухіляць налёты ўкраінскіх дронаў.

Вядома, можна дапусціць, што праз краіны Балтыі або, напрыклад, Скандынавіі нейкім чынам украінскія дроны залятаюць на тэрыторыю РФ, але ўзнікае пытанне: чаму ў гэтых абвінавачаннях не фігуруе Польшча? Украінскія дроны мусяць неяк залятаць у Літву, Латвію, Эстонію, а потым, напэўна, нават на тэрыторыю Фінляндыі, але як з тэрыторыі Украіны яны могуць заляцець? Альбо праз Польшчу, альбо праз Беларусь.

То-бок Беларусь, «саюзная» дзяржава Расійскай Федэрацыі, прадастаўляе сваю паветраную прастору для таго, каб выкарыстоўваўся такі маршрут? Ці Польшча, якая паводле патэнцыялу сваёй арміі значна мацнейшая за Эстонію, Літву, Латвію. У Крамлі спрабуюць як-небудзь ігнараваць гэтае пытанне.

Найпросты элементарны дысананс, які ўзнікае, калі проста адкрываеш карту. Нават любы трэцякласнік сярэдняй агульнаадукацыйнай школы I–III ступеняў у РФ, які адкрые геаграфічную карту, проста ўбачыць рэальнасць, якую не хочуць бачыць дзеды пры ўладзе ў Расіі, што насаджаюць такі інфармацыйны маразм спажыўцам інфармацыйнага фастфуду.

Ёсць яшчэ трэці, вельмі важны момант, на які неабходна звяртаць увагу. Расія часта выкарыстоўвае падобнага кшталту інсінуацыі і абвінавачанні для таго, каб у далейшым апраўдаць сваю агрэсію супраць адной з гэтых краін. Напрыклад, супраць Украіны гадамі фармаваліся рознага кшталту фэйкі і інсінуацыі адносна біялабараторый, падрыхтоўкі нейкай агрэсіі, тэрарыстычных актаў супраць Расіі, фарміравання ў РФ нейкіх тэрарыстычных груповак і гэтак далей.

Генерацыя рознага кшталту фэйкавай інфармацыі ажыццяўлялася ў рэжыме нон-стоп напярэдадні паўнамаштабнага ўварвання, нават калі гэтая інфармацыя наогул і блізка не суадносілася з логікай і здаровым сэнсам. Таму не выключаю, што гэта можа быць пэўная інфармацыйная падрыхтоўка для той катэгорыі расійскага спажыўца інфармацыйнага фастфуду, вось гэтага плебсу, які гатовы гэта ўспрымаць. Расія сапраўды ў кароткатэрміновай перспектыве можа распачаць пэўную аперацыю супраць адной з краін Балтыі як мінімум.

Хутчэй за ўсё, зноў жа, гэта можа быць Эстонія як найбольш на сённяшні дзень уразлівая краіна з усіх краін Еўрапейскага саюза і Паўночнаатлантычнага альянсу.

Паралельна гэта спроба яшчэ схаваць абсалютную небаяздольнасць сваёй СПА, яе дэградацыю. Бо ўсе ўдарныя дроны ЗСУ пераадольваюць адлегласць да расійскіх мэтаў менавіта па тэрыторыі РФ.

Гэта спрабуюць неяк схаваць, камбінуючы абвінавачанні супраць краін Захаду, і пры гэтым паралельна Пуцін не адмаўляецца ад планаў уварвання ў адну з краін НАТА. Яны спрабуюць усё гэта комплексна злучыць і скамбініраваць у адзінае цэлае, каб было і апраўданне гэтых удараў, і прыкрыццё няздольнасці сваёй СПА, і, безумоўна, каб патлумачыць свайму плебсу, чаму мы напалі, напрыклад, умоўна кажучы, на тую ж самую Эстонію.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]