Швецыя затрымала судна, што выйшла з расійскага порта

Балкер западазрылі ў скіданні вугальных адходаў у Балтыйскім моры.

У нядзелю, 12 красавіка, шведская берагавая ахова паднялася на борт судна Hui Yuan у Балтыйскім моры ля берагоў Істада, паведамляе тэлеканал SVT. Балкер пад сцягам Панамы накіроўваўся з расійскага порта Усць-Луга ў Лас-Пальмас (Іспанія). Прычынай затрымання стаў скід вугальных адходаў з палубы ў мора, які выявілі самалёты берагавой аховы.

«Берагавая ахова затрымала судна за скід вугальных адходаў… Гэта парушэнне Экалагічнага кодэкса. Таму мы хочам атрымаць інфармацыю ад капітана судна і паведаміць пра падазрэнні. Паглядзім, ці скончыцца гэта вынясеннем пастановы аб накладанні штрафу або адміністрацыйным спагнаннем», — заявіў старшы пракурор Нацыянальнага падраздзялення па справах, звязаных з аховай навакольнага асяроддзя, Хакан Андерссон.

Намеснік начальніка аператыўнага аддзела берагавой аховы Даніэль Стэнлінг папярэдзіў судаходныя кампаніі, што шведскія ўлады ўважліва сочаць за парадкам на моры. «Мы прымаем меры для павышэння бяспекі на моры і абароны навакольнага асяроддзя. У выпадку выяўлення падазронага судна мы ўмешваемся з улікам абставін», — сказаў ён. Прэс-сакратар берагавой аховы Карын Карс дадала, што супрацоўнікі службы пастаянна вядуць маніторынг і праводзяць планавыя праверкі.

У сувязі з інцыдэнтам было распачата папярэдняе расследаванне, пракурор прыняў рашэнне аб допыце членаў экіпажа, піша SVT. Судна, паводле канала, у цяперашні час стаіць на якары ля берагоў Істада.

Гэта не першы падобны інцыдэнт у шведскіх водах. Раней, 3 красавіка, берагавая ахова Швецыі затрымала нафтавы танкер «Flora 1», які ўваходзіць у расійскі «ценявы флот». Судна, што ішло з расійскага Прыморска, западазрылі ў разліве нафты за 12 кіламетраў ад вострава Готланд. Да гэтага, 12 сакавіка, берагавая ахова высадзілася на танкер «ценявога флоту» «Sea Owl» каля порта Трэлеборг, а тыднем раней быў затрыманы сухагруз «Caffa», які, паводле звестак шведскіх уладаў, рухаўся пад ілжывым сцягам і, паводле інфармацыі ўкраінскага боку, удзельнічаў у транспарціроўцы збожжа з анексаванага Севастопаля.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]