Пуцін дазволіў засакрэціць фінансавыя паказчыкі найбуйнейшай дзяржаўнай прамысловай кампаніі Расіі

Яе ўзначальвае Сяргей Чэмязоў.

Дзяржкарпарацыі «Ростэх» Сяргея Чэмязова, найбуйнейшай паводле маштабаў вытворчасці кампаніі ў Расіі, дазволена не публікаваць фінансавую справаздачнасць. Як вынікае з падпісанага дыктатарам Уладзімірам Пуціным указа, холдынг, які з’яўляецца найбуйнейшым вытворцам зброі ў краіне, цяпер можа самастойна вырашаць, якую менавіта інфармацыю з гадавой справаздачы і ў якім аб’ёме будзе размяшчаць у інтэрнэце, перадае The Moscow Times.

Папраўкі ўнесены ў прэзідэнцкі ўказ ад 2024 года, які дазваляе эканамічна значным арганізацыям (ЭЗО) не раскрываць звесткі пра сваю дзейнасць праз «недружалюбныя» дзеянні заходніх краін. Такія суб’екты могуць не публікаваць дадзеныя, прадугледжаныя законамі аб акцыянерных таварыствах, банках, ТАА, кансалідаванай фінансавай справаздачнасці, абароне канкурэнцыі і іншых. У «Ростэх» уваходзяць звыш 800 навуковых і вытворчых арганізацый у 60 рэгіёнах РФ, уключаючы найбуйнейшыя гіганты, такія як «АўтаВАЗ», «КАМАЗ», Аб’яднаная авіябудаўнічая карпарацыя (ААК), «Верталёты Расіі», «Уралвагонзавод», «Канцэрн Калашнікаў» і інш.

Па выніках 2024 года (даных за 2025-ы пакуль няма), «Ростэх» нарастіў выручку на 27% у гадавым выражэнні да 3,61 трлн рублёў, паведамляў Чэмязоў. Паводле яго слоў, чысты прыбытак за год вырас на 119% да 131,5 млрд рублёў, а аб’ём інвестыцый — у 1,3 раза, да 676 млрд рублёў, «перш за ўсё за кошт росту абароннага заказу і задачы па нарошчванні магутнасцяў нашых прадпрыемстваў і іх мадэрнізацыі для надзейнага выканання дзяржаўнага абароннага заказу».

Пры гэтым асобныя кампаніі, што ўваходзяць у кантур «Ростэха», нясуць страты. Напрыклад, «КАМАЗ», найбуйнейшы расійскі вытворца грузавікоў, па выніках 2025 года зафіксаваў чысты ўбытак па РСБУ ў 37 млрд рублёў (у 11 разоў большы ў параўнанні з 2024-м). Чысты ўбытак АТ «Верталёты Расіі» па РСБУ за першае паўгоддзе 2025-га склаў 2,5 млрд рублёў (супраць 5,5 млрд рублёў прыбытку годам раней).

Прасяданне фінансавых паказчыкаў фіксуецца і ў некаторых рэгіянальных падраздзяленнях карпарацыі. Так, «ОДК-Уфімскае маторабудаўнічае вытворчае аб’яднанне», якое ўваходзіць у Аб’яднаную рухавікабудаўнічую карпарацыю, па выніках мінулага года паказала страты больш як на 14,3 млрд рублёў (у 2024-м было 8,4 млрд прыбытку).

Таксама ўказ даў права «натуральным манаполіям» («Газпрам», «Транснафта», РЖД і інш.) цяпер не раскрываць рэгулятарную інфармацыю, якую раней яны мусілі абнародаваць менавіта як манаполіі. Сярод іншага гэта звесткі пра інвестыцыйныя праграмы і тарыфы, якія раней забаранялася адносіць да камерцыйнай таямніцы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]