Адключэнне інтэрнэту паралізавала бізнес у цэнтры Масквы
4- 10.03.2026, 15:30
- 3,632
«Зламалася ўсё».
У межах Садовага кальца ў Маскве пяты дзень — перабоі з інтэрнэтам, а часам і з мабільнай сувяззю, распавядаюць тыя, хто жыве і працуе ў цэнтры сталіцы. Гэта звязана з тым, што Мінцыфры тэстуе магчымасць блакіроўкі сайтаў, не ўключаных у «белы спіс», піша The Moscow Times.
«Зламалася ўсё», — каментуе гэта жыхар Замаскварэцця, у якога дома з 6 сакавіка няма ні мабільнага, ні праваднога інтэрнэту — у тым ліку пры спробе зайсці на сайты са спісу. «Білайн» 6 сакавіка папярэдзіў пра магчымыя перабоі ў працы сеткі ў Маскве з-за «знешніх абмежаванняў». Пра тое ж паведаміў 8 сакавіка аператар гарачай лініі МТС.
«З 6 сакавіка няма не тое што мабільнага інтэрнэту ў «вялікай тройкі», дык яшчэ і мабільнай сувязі не было. Выхадзіш з дому — і атрымліваеш поўны лічбавы дэтокс», — распавядае жыхарка дома ля Чыстых Прудаў. У паслясвяточны працоўны аўторак магчымасць прымаць званкі з’явілася, але СМС не прыходзяць, у інтэрнэце не адкрываюцца нават сайты з «белага спісу», кажа масквічка.
«Так і жывём — перабежкамі ад вай-фая да вай-фая», — скардзіцца на тыя ж праблемы жыхар Кітай-гарада. Паход па пакупкі ў гэтыя дні ператварыўся ў латарэю, дзеліцца ён: «Калі ў цябе няма наяўных, дык пытанне — ці прададуць табе хоць што-небудзь, бо ў многіх касы былі настроены на мабільную перадачу дадзеных».
У аўторак інтэрнэт з’явіўся каля некаторых станцый метро. «Увогуле ўвесь цэнтр нібыта «ў дзірках»: выйшаў з дому і не ведаеш, ці будзеш на сувязі, ці не», — кажа масквіч.
У выхадныя крамы «Дзіксі» ў цэнтральных раёнах гандлявалі толькі за наяўныя, але частку тавараў, напрыклад безалкагольныя напоі, малочныя прадукты, корм для жывёл, купіць усё роўна было нельга: яны проста не прабіваліся на касах. Праверка «Честного знака» на такой прадукцыі настроена праз мабільны інтэрнэт, таму праблемы ўзнікалі ва ўсіх раёнах, дзе абмежаваны інтэрнэт, тлумачылі прадаўцы.
Супрацоўнікі кафэ і рэстаранаў унутры Бульварнага кальца таксама кажуць пра праблемы — узнікаюць складанасці з тэрміналамі пры аплаце, кліенты не могуць патэлефанаваць і напісаць наконт браніравання столікаў, не пералічваюць чаевыя: «А ад наяўных многія ж адвыклі».
У Таганскім раёне тэлефанаваць з мабільнага можна, але інтэрнэту няма ніякага — ні мабільнага, ні праваднога, распавядае ўладальнік невялікага аўтасэрвісу паблізу Садовага кальца. Гэта стварыла праблемы яго бізнесу: у яго працавала анлайн-запіс і заказ запасных частак праз сайт, а сам ён тры дні не мог атрымаць доступ да свайго сайта. «Як і ўсім калегам, давялося шаманаваць: высветлілася, напрыклад, што калі выключыць у наладах прылады 4G, то на 3G інтэрнэт часам як-небудзь працуе», — кажа прадпрымальнік.
Як заўсёды, пры праблемах з мабільным інтэрнэтам расце колькасць заявак на падключэнне па аптычным валакне, кажа супрацоўнік правайдэра, які працуе ў цэнтры Масквы. Па яго ацэнцы, асабіста ў яго колькасць выкананых заказаў на падключэнне з 6 па 10 сакавіка падскочыла ўтрая. Гандлёвыя кропкі, салоны прыгажосці, крамы, рэстараны цяпер занепакоіліся якасцю сваіх падключэнняў да стацыянарнага інтэрнэту, дадае ён. «Без інтэрнэту «з разеткі» цяпер ніяк, прычым яго павінна хапаць не толькі нам, але і нашым кліентам», — кажа кіраўніца салона эпіляцыі ў раёне «Беларускай».
«Правалы» са сувяззю ўзнікаюць не толькі ў цэнтры. У нядзелю знікала сувязь у Капцёве (паўночная Масква), паступаюць паведамленні пра збоі каля ВДНХ, у Лефортаве і на «Бауманскай».
Прэс-сакратар Пуціна Дзмітрый Пяскоў заявіў толькі, што «ўсе адключэнні і абмежаванні сувязі» адбываюцца згодна з законам і звязаныя з забеспячэннем бяспекі, а што да праблем, якія гэта стварае для бізнесу, то ўлады вывучаць сітуацыю і прапануюць нейкае рашэнне.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
