Новая рэальнасць

Беспілотнік з выбухоўкай падае на сталіцу.

Супрацьпаветраная абарона Беларусі дрэнна падрыхтаваная да барацьбы з беспілотнікамі. І размяшчэнне расейскай ядзернай зброі і ракетнага комплексу «Арэшнік» не дапаможа развязаць гэтую праблему.

Нейтралізацыя беспілотніка з выбухоўкай, які ўпаў на двухмільённы горад, - гэта непрафесіяналізм або безадказнасць?

Рана ці позна гэтага варта было чакаць. Вайна ў выглядзе дронаў дабралася і да Менска. Уночы 29 ліпеня ў Цэнтры беларускай сталіцы разбіўся беспілотнік. Следчы камітэт (СК) сцвярджае, што дрон быў начынены боегалоўкай, напоўненай трацілам і вялікай колькасцю паражальных элементаў.

Са слоў відавочцаў, дрон рэзнуўся ў жылы дом, пасля чаго ўпаў на зямлю. СК сцвярджае, што дрон упаў у двары. Пашкоджаныя некалькі аўтамабіляў. Дзякаваць Богу, абышлося без чалавечых ахвяр, хоць у двары дома, дзе адбыўся інцыдэнт, знаходзіцца дзіцячы садок.

Варта і было чакаць чагосьці такога, бо адбываецца эскалацыя вайны ва Украіне. Расея за год павялічыла вытворчасць беспілотнікаў у пяць разоў. Паводле ацэнак вайсковых экспэртаў, да лістапада расейцы змогуць наносіць масаваныя ўдары па Украіне, выкарыстоўваючы да 2000 дронаў адначасова. Проста па тэорыі імавернасці, усё большая іх колькасць залятае ў Беларусь. У першы тыдзень ліпеня было зафіксавана не менш за 59 такіх інцыдэнтаў, піша «Флагшток». Гэта рэкордная колькасць.

Цяпер дрон дабраўся і да Менска. У ліпені былі зафіксаваныя два выпадкі пранікнення дронаў у Літву з тэрыторыі Беларусі. Летась дрон праляцеў праз усю тэрыторыю Беларусі і прызямліўся ў Латвіі.

Гэтыя факты даюць падставы зрабіць выснову аб слабай гатоўнасці супрацьпаветранай абароны Беларусі да барацьбы з беспілотнікамі. З пачаткам расейскай агрэсіі супраць Украіны Аляксандр Лукашэнка стаў надаваць абароне значна больш увагі.

Практычна кожныя два тыдні ён праводзіў нарады, на якіх генералы паведамлялі, што беларускае войска становіцца мацнейшым з кожным днём. У краіне ідзе працэс мілітарызацыі ўсіх сфер жыцця. Створаны тэрытарыяльныя войскі, народнае апалчэнне, а дзяцей рыхтуюць да вайны ў школах.

Але цяпер высвятляецца, што беларуская вайсковая машына дрэнна прыстасаваная да барацьбы з беспілотнікамі. Яны лётаюць па ўсёй тэрыторыі краіны і нават залятаюць у суседнія краіны.

7 кастрычніка 2024 года Лукашэнка падпісаў указ, які дазваляе збіваць беспілотнікі не толькі вайскоўцам, але і супрацоўнікам іншых ваенізаваных арганізацый, уключаючы пракуратуру, мытню, камітэт судовых экспэртыз і нават інспекцыю аховы жывёльнага і расліннага свету. Сам факт прыняцця такога ўказа сведчыць як аб надзвычайнай сітуацыі ў краіне, так і аб яе ўразлівасці перад новай зброяй. Адразу ўяўляецца карціна, як пракурор або судмедэкспэрт расстрэльвае дрон з пісталета.

Чамусьці здаецца, што размяшчэнне расейскай ядзернай зброі і ракетнага комплексу «Арэшнік» у Беларусі не моцна дапаможа ў барацьбе з беспілотнікамі. Як вядома, генералы заўсёды рыхтуюцца да мінулай вайны.

Міністэрства абароны Беларусі паведаміла, што сілы СПА спынілі палёт беспілотніка сродкамі радыёэлектроннай барацьбы. Яны «спынілі» яго так, што ён упаў. Гэта значыць, ён быў збіты?

Але збіць беспілотнік сродкамі радыёэлектроннай барацьбы немагчыма, яго можна толькі перанакіраваць. Улічваючы, што беспілотнік, са звестак Следчага камітэта, нёс выбухоўку, збіваць яго ці «спыняць» такім чынам, што ён упаў у густанаселеным раёне двухмільённага горада – сталіцы Беларусі – гэта непрафесіяналізм або безадказнасць?

Сітуацыя для беларускіх уладаў у кожным выпадку непрыемная. Перш за ўсё, руйнуецца ідэалагічны міф пра тое, што толькі дзякуючы Лукашэнку, Беларусь не ўдзельнічае ў вайне, што ён з'яўляецца гарантам міру, мірнага неба.

Другі момант. Дагэтуль усе дроны, якія заляталі ў Беларусь, былі расейскімі. Што стварала пэўныя нязручнасці для прапаганды.

Цяпер Служба бяспекі Украіны апублікавала відэазапіс катастрофы беспілотніка, на абломках якога былі бачныя надпісы на ўкраінскай мове. Складана сказаць, наколькі гэты сюжэт адпавядае рэчаіснасці, але вораг пазначаны.

У кожным выпадку, пагроза з боку беспілотнікаў расце. І эфектыўнага процідзеяння ёй няма і не прадбачыцца.

Яшчэ адзін важны нюанс. Летась, як толькі расейскія «шахеды» пачалі прылятаць у Беларусь, беларускія ўлады маўчалі. Цяпер жа яны дэманструюць беспрэцэдэнтную адкрытасць. Сітуацыю каментуюць Мінабароны, Следчы камітэт і менская міліцыя. Бо калі ў сталіцы адбываецца такая рэзанансная падзея, хаваць што-небудзь бессэнсоўна.

Праваабарончы цэнтр «Вясна» паведамляе, што на месцы падзення беспілотніка АМАП затрымлівае менчукоў. Хоць менская міліцыя гэта адмаўляе, у такое развіццё падзей лёгка паверыць. Бо затрымліваць людзей - адзінае, што ўлада ўмее рабіць добра.

Расейскія беспілотнікі пачалі рэгулярна з'яўляцца ў паветранай прасторы Беларусі год таму. Былі зафіксаваныя выпадкі іх падзення на Гомель, Калінкавічы, Хойнікі.

Валер Карбалевіч, svaboda.org

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]