У Мастах самавольна скарацілі цэлы этап «выбараў»
4- 5.03.2010, 16:10
Мастоўскі райвыканкам вырашыў скончыць прыём дакументаў па вылучэнні ў склад участковых камісій на два дні раней, чым неабходна па законе.
У адпаведнасці з артыкулам 34-35 Выбарчага кодэкса Беларусі ўчастковыя выбарчыя камісіі фармуюцца не пазней чым за 45 дзен да выбараў. Як адзначаюць «Праваабаронцы за свабодныя выбары», заявы і пратаколы аб вылучэнні сваіх прадстаўнікоў у склад участковых выбарчых камісій прадстаўляюцца не пазней чым за тры дні да даты фармавання камісій.
У адпаведнасці з Календарным планам мерапрыемстваў па выбарах дэпутатаў мясцовых Саветаў 26 склікання, зацверджаных пастановай Цэнтральнай выбарчай камісіі Рэспублікі Беларусь дакументы аб фармаванні камісій прадстаўляюцца да 07.03.2010 г. уключна, а паседжанні органаў па фармаванні камісій адбываюцца не пазней за 10.03.2010 г.
Аднак Мастоўскі выканкам, адказны за фармаванне выбарчых камісій, вывесіў абвестку, што прыём дакументаў па вылучэнні ў склад участковых выбарчых камісій будзе ажыццяўляцца да 5 сакавіка 2010 года. Застаецца толькі здагадвацца, адказныя асобы забылі паглядзець у Каляндарны план альбо проста не маюць адпаведнай кампетэнцыі ў арганізацыі выбараў?
Актывіст «Руху за свабоду», актыўны ўдзельнік выбарчай кампаніі, Алесь Зарэмбюк рэзонна палічыў гэта парушэннем выбарчага заканадаўства і накіраваў адпаведныя скаргі ў раённую пракуратуру і ЦВК.
Алесю Зарэмбюку патэлефанаваў супрацоўнік арганізацыйна-прававога аддзела Цэнтральнай выбарчай камісіі Глеб Хмялёў і паведаміў пра тое, што праблема вырашана і прэтэндэнты змогуць рэалізаваць свае законныя правы.
