Пуцін раскрыў грабніцу Дзмітрыя Данскога, каб адправіць ягоныя мошчы на «СВА»

Пра «цудоўнае» набыццё мошчаў старажытнарускага князя РПЦ абвясціла 18 жніўня.

Расійскія ўлады зноў звяртаюцца да праваслаўных святых у надзеі дапамагчы арміі, што ваюе ва Украіне, тэмпы наступлення якой сёлета рэзка запаволіліся.

У чацвер, 20 жніўня, дыктатар Расіі Уладзімір Пуцін правёў малебен у Архангельскім саборы Крамля, дзе два дні таму, паводле паведамлення РПЦ, былі «знойдзеныя» мошчы Дзмітрыя Данскога — старажытнарускага князя, які ў 1380 годзе атрымаў перамогу над войскам Мамайевай Арды на Куліковым полі, піша The Moscow Times.

На кадрах, апублікаваных прэс-службай Крамля і дзяржаўным агенцтвам ТАСС, Пуцін трымае свечку каля алтара, хрысціцца падчас малебну аб «пераможным воінстве», «краіне расійскай і прэзідэнце», а пасля аглядае дзве раскрытыя грабніцы з астанкамі, прыкрытымі тканінай.

Пра «цудоўнае» набыццё мошчаў Дзмітрыя Данскога, які быў прылічаны да ліку святых у 1988 годзе, РПЦ абвясціла 18 жніўня. Крыніца ТАСС распавяла, што ў Архангельскім саборы разабралі падлогу і цагляныя надмагіллі ў склепе, пасля чаго адкрыліся астанкі «ў поўнай камплектнасці, за выключэннем левай пяткавай косткі». У РПЦ растлумачылі раскрыццё грабніц рамонтнымі работамі і прапанавалі накіраваць частку мошчаў у зону «СВА». «Магчымасць такога пакланення павінна быць прадстаўлена праваслаўным вайскоўцам як мага хутчэй», — заявіў у чацвер намеснік старшыні сінодальнага аддзела Маскоўскага патрыярхату па ўзаемаадносінах царквы з грамадствам і СМІ Вахтанг Кіпшыдзэ.

Пуцін падчас візіту ў сабор адабрыў планы РПЦ адносна мошчаў. «Учора я размаўляў са Свяцейшым, ведаю пра яго планы [што да мошчаў Дзмітрыя Данскога]. Перадавайце яму самыя найлепшыя пажаданні», — сказаў Пуцін. Ён назваў набыццё мошчаў «абсалютна ўнікальным», «дзівосным» і «цудоўным».

Журналістка, аўтарка канала «Праваслаўе і зомбі» Ксенія Лучэнка адзначае, што гісторыя з мошчамі відавочна «не экспрамт», падрыхтоўка да яе ішла «даволі доўга». І гісторыкі, і РПЦ ведалі, дзе пахаваны Дзмітрый Данскі, хапала проста раскрыць магілу. «Астанкі князя засталіся ляжаць, дзе ляжалі. Ад іх аддзялілі нейкія невялікія фрагменты і змясцілі ў спецыяльна падрыхтаваныя каўчэгі-мошчаўнікі, — апісвае працэс Лучэнка. — Гэтыя мошчаўнікі і будуць як святыню вазіць па крыжовых хадах і лініі баявога судакранання».

Мітрапаліт Кірыл Пакроўскі, кіраўнік Сінодальнага ваеннага аддзела, ужо выказаў глыбокую надзею на тое, што «адзін з гэтых каўчэгаў адправіцца на перадавую, каб надалей пастаянна знаходзіцца ў вайсковых падраздзяленнях у зоне баявых дзеянняў».

Саркафаг Дзмітрыя Данскога раней раскопвалі толькі аднойчы — у 1860-х гадах, каб перамясціць яго вышэй. Магчыма, уладам «спатрэбілася чарговае містыка-ідэалагічнае мерапрыемства», бо «рытм губляецца», не выключае Лучэнка. У мінулым годзе на фронт дастаўлялі часціцы мошчаў святога Мікалая Цудатворца, святых Пятра і Фяўроніі Мурамскіх, свяціцеля Лукі Крымскага і Матроны Маскоўскай, а таксама некалькі абразоў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]