Канфіскаваны McLaren выставілі на таргі ў Беларусі

Стартавы кошт уражае.

На аўкцыённай пляцоўцы гандлёвага дома «Усходні» з’явіўся цікавы экспанат: суперкар McLaren, заўважыў Office Life.

Гэты аўтамабіль везлі з Літвы ў Беларусь яшчэ восенню 2021 года, то бок да вайны і санкцый, але канчатковым пакупніком быў расіянін. Пры гэтым растамажыць машыну планавалі ў Беларусі.

Спарткар McLaren 720S выпуску 2019 года везлі на лафеце праз літоўска-беларускую мяжу. З тэрыторыі Еўразвязу машына выехала без праблем, а вось на беларускім баку пачаліся праблемы.

Справа ў тым, што згодна з прадстаўленымі дакументамі, кошт двухгадовага спарткара з прабегам каля 300 кіламетраў складаў усяго 17 990 еўра. Такая цана выклікала абгрунтаваныя падазрэнні ў беларускай мытні. Яны вызначылі, што рэальны кошт аўто — 261 579 еўра, што ў 14,5 раза больш за заяўлены.

Чаму на таргі выставілі толькі цяпер?

Нягледзячы на тое, што справа бярэ пачатак з лістапада 2021 года, канчатковае рашэнне канфіскаваць аўто суд прыняў толькі ў лютым 2026 года.

Чаму гэты працэс цягнуўся больш за чатыры гады — невядома. Але вядома, што спарткар ўвазілі на льготніка — інваліда другой групы, каб растамажыць аўто паводле ўказа №140, то бок з 50‑працэнтнай зніжкай.

Пры гэтым, як высветлілася, сапраўдным пакупніком амаль новага McLaren быў пэўны расіянін, а Беларусь была патрэбная толькі дзеля эканоміі на мыце.

Справа ў тым, што аўто ва ўзросце да 3 гадоў растамажваюцца па стаўцы 48% ад кошту (але не менш за 5,5 еўра за куб. см). Адпаведна, калі растамажваць яго на льготніка, то стаўка будзе 24% (2,75 еўра за куб. см).

У выніку Гродзенская мытня падлічыла, што заніжэнне кошту магло прывесці да ўхілення ад уплаты мытных плацяжоў на суму больш за 280 тысяч рублёў.

Сачыце за лічбамі

Калі браць указаную ў суправаджальных дакументах суму 17 990 еўра і пры гэтым растамажыць аўто на беларускага льготніка, як і планавалася, то мытныя плацяжы склалі б усяго каля 11 000 еўра.

А калі браць кошт ад мытні (які выглядае значна больш рэалістычным) і растамажваць аўто па поўным тарыфе, бо сапраўдны ўладальнік ніякіх льгот не мае, то заплаціць давялося б каля 125 000 еўра.

Аднак жаданне зэканоміць больш за 110 тысяч еўра на мыце абярнулася чатырма гадамі судоў і канфіскацыяй аўто.

Цяпер ужо шасцігадовы спарткар McLaren 720S з прабегам 313 кіламетраў выставілі на продаж на гродзенскай пляцоўцы канфіскату ад ГД «Усходні».

Стартавы кошт аўтамабіля — 1 041 444 рублі, што складае каля 307 500 еўра па бягучым курсе. У апісанні стан аўтамабіля пазначаны як здавальняючы: дробныя нязначныя драпіны на кузаўе, акумулятар разраджаны. Ключ запальвання ёсць, рухавік запускаецца.

Першыя таргі павінны адбыцца 24 красавіка.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]