Нямецкі спецназ пачалі рыхтаваць да магчымай вайны з Расіяй

Спецназаўцы вучацца ваяваць супраць арміі з танкамі, артылерыяй, беспілотнікамі і сродкамі РЭБ.

Нямецкае камандаванне спецыяльных аперацый (KSK) перабудоўвае падрыхтоўку з улікам магчымай вайны з Расіяй. «Мы арыентуемся на праціўніка ў асобе Расіі», — заявіў Bild камандзір KSK, брыгадны генерал Андрэас Кюнэ. Паводле яго слоў, раней аперацыі спецназа планаваліся прыкладна на тры дні, а потым вайскоўцы вярталіся на базу. Цяпер ім давядзецца значна даўжэй заставацца ў палявых умовах. «Магчыма, спачатку ўвогуле без вызначанага тэрміну», — адзначыў генерал.

Паводле яго слоў, падчас вучэнняў у краінах Балтыі Германія ўжо прадэманстравала магчымасці свайго спецназа. Гэта павінна пераканаць Маскву, што напад на НАТА абернецца для Расіі сур'ёзнымі стратамі. «Пуцін ведае нашу баявую магутнасць», — заявіў Кюнэ.

Нямецкія спецназаўцы вучацца ваяваць супраць арміі з танкамі, артылерыяй, беспілотнікамі і сродкамі радыёэлектроннай барацьбы. Таксама яны трэніруюцца дзейнічаць ва ўмовах экстрэмальных халадоў, рыхтуюцца да аперацый на ўсходнім флангу НАТА. Паводле Кюнэ, у выпадку вайны з Расіяй нямецкі спецназ павінен пачаць дзейнічаць раней за асноўныя сілы Бундэсвера. KSK плануе выканаць свае задачы яшчэ да таго, як у бой уступіць дыслакаваная ў Літве 45-я танкавая брыгада. Генерал адзначыў, што падраздзяленне здольнае цягам чатырох гадзін вылецець са Штутгарта.

KSK базуецца ў казармах Цэпеліна ў горадзе Кальв. У падраздзяленні каля 1500 супрацоўнікаў, і толькі трэцяя іх частка — спецназаўцы. Укамплектаванасць KSK складае 70–80%. Адбор у спецназ праходзяць толькі крыху больш за 15% кандыдатаў. Падчас трэніровак байцы штогод выдаткоўваюць да 500 тысяч патронаў, таксама ў падраздзяленні займаюцца рукапашным боем, плаўаннем і сілавой падрыхтоўкай.

Створаны ў 1996 годзе KSK удзельнічаў у вызваленні закладнікаў, барацьбе з тэрарыстамі, эвакуацыі людзей з зон канфліктаў і разведвальных аперацыях у тыле праціўніка. У Афганістане нямецкія спецназаўцы ваявалі супраць талібаў. Некалькі гадоў таму падраздзяленне апынулася пад пагрозай расфарміравання з-за серыі скандалаў, звязаных з ультрапраўымі. Сярод іх былі нацысцкія вітанні, вечарына са свінымі галовамі, знікненне боепрыпасаў і выяўленне ў спецназаўца тайніка са зброяй і выбухоўкай. У 2020 годзе адну з рот KSK расфарміравалі. Кюнэ сцвярджае, што падобныя парушэнні сталі надзвычай рэдкімі, але цалкам не зніклі.

У чэрвені камандуючы Ваенна-паветранымі сіламі Германіі генерал Хольгер Нойман заявіў, што нямецкая авіяцыя гатовая наносіць удары па расійскіх ваенных аб'ектах у выпадку нападу Расіі на НАТА. Сярод магчымых мэтаў ён назваў аб'екты ў Калінінградскай вобласці, на Кольскім паўвостраве, у раёне Санкт-Пецярбурга і ў Чорным моры. «Мы будзем абараняць кожны дзюйм нашай тэрыторыі», — сказаў генерал.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]