Падзенне самалёта Прыгожына паказалі на відэа: борт страціў 3 км вышыні за паўхвіліны

Авіяэксперты падалі драбніцы катастрофы джэта Embraer Legacy.

Бізнэс-джэт Embraer Legacy 600, у спісе пасажыраў якога лічыўся заснавальнік ПВК Вагнера Яўгеній Прыгожын, за 30 сэкундаў знізіўся амаль на 3 кіламэтры, затым яшчэ некалькі сэкундаў трымаў вышыню, а пасля пачаў падаць і разбіўся.

У публікацыі на сайце flightradar24.com гаворыцца, што сэрвіс атрымаў першыя звесткі ад Embraer а 17.46 маскоўскага часу. Пад 18.10 самалёт выйшаў на крэйсерскую вышыню, перад гэтым ненадоўга знізіўшыся. Праз 9 хвілін вертыкальная хуткасць самалёта (змена вышыні палёту за адзінку часу) пачала імкліва мяняцца.

Самалёт знізіўся да 27 500 футаў (8 382 мэтраў), затым зноў падняўся да 29 300 футаў (8 930 мэтраў). Апошнія звесткі ад самалёта былі атрыманыя а 18.20 маскоўскага часу: за наступныя 32 сэкунды ён знізіўся да 19 725 футаў (6012 мэтраў).

Дырэктар камунікацый сэрвісу Flightradar24 Ян Пячэнік раскачаў Reuters, што а 18.19 маскоўскага часу самалёт пачаў імкліва зніжацца.

«Што б ні здарылася, гэта адбылося хутка. Магчыма, яны змагаліся [з самалётам] пасля таго, як нешта адбылося», — заявіў ён. Да гэтага, зазначыў ён, "не было ніякіх прыкмет таго, што з гэтым самалётам нешта не так".

Бізнэс-джэт, які належаў заснавальніку ПВК Вагнера Яўгенію Прыгожыну, пацярпеў катастрофе ля сяла Кужэнкіна ў Цвярской вобласці ўвечары 23 жніўня. Следчы камітэт Расеі распачаў крымінальную справу аб парушэнні правілаў бяспекі руху і эксплуатацыі паветранага транспарту.

Расавіяцыя апублікавала спіс пасажыраў самалёта, які разбіўся. Сярод іх - Яўгеній Прыгожын, камандзір ПВК Дзмітрый Уткін і Валерый Чакалаў — кіраўнік фірмаў, звязаных з Прыгожыным. Паведамляецца аб іхняй загубе, але афіцыйна іхняя смерць не пацверджаная.

Катастрофа самалёта Прыгожына адбылася роўна праз два месяцы пасля бунту заснавальніка ПВК.