«Мне спадабалася, галоўнае – не глядзець»
12- 1.12.2023, 16:30
- 9,414
![«Мне спадабалася, галоўнае – не глядзець»](https://i.c97.org/p/articles/ai-235770-aux-head-26122016_restoran_360.jpg)
Беларусы расказалі пра самыя дзіўныя і незвычайныя стравы.
Фрыкадэлькі з алігатара, варанае яйка з зародкам усярэдзіне, марожанае з цюленевага тлушчу. Беларусы на просьбу BAR24 расказалі пра самыя незвычайныя стравы, якія ім даводзілася калі-небудзь каштаваць.
Высветлілася, што больш за ўсё дзіўных страваў спрабавалі гараджане, якія працавалі або якія працуюць на круізных лайнерах.
– Працавала ў ЗША на круізным лайнеры. Гасцям падавалі мітболы з алігатара. Гэта нешта накшталт нашых фрыкадэлек. На смак як старое смажанае сала – агідна! Але амерыканцам падабалася. Слімакамі ці лобстарамі там нікога не здзівіць, – расказала гараджанка Ірына. І дадала, што, пакуль працавала там, «усё перакаштавала» – ад дэльфінаў да галубоў.
Яшчэ адзін працаўнік круізнага лайнера, Сяргей, расказаў, што самым дзіўным далікатэсам у ягоным жыцці была філіпінская страва балот. Гэта варанае качынае яйка «з ужо сфармаваным зародкам усярэдзіне».
![](https://i.c97.org/ai/573775/aux-1701437241-morskoj-bogomol.jpg)
– Каштаваў яго на Філіпінах. У іх там гэта, як у нас – лодачкі. Звычайна балот ядуць з воцатам, соллю і табаска. На смак як варанае яйка з курыцай. Мне спадабалася, галоўнае – не глядзець, – падзяліўся ўражаннямі Сяргей.
З незвычайных страваў – салата з дзьмухаўцоў і суп з крапівы.
Успаміны пра незвычайныя стравы многія прывозілі проста з замежных паездак. Так, гараджанка Алена падчас падарожжа ў Грэцыю каштавала салату з дзьмухаўцоў.
– Зайшлі ў рэстаран, убачылі ў меню нешта экзатычнае і надумалі пакаштаваць. Смак не ўзгадаю. Але памятаю, што каштавала салата блізу 3,5 еўра. Яшчэ абмяркоўвалі, што мы, напэўна, з глузду з'ехалі: плаціць грошы за варанае лісце дзьмухаўцоў, – расказала Алена.
![](https://i.c97.org/ai/573775/aux-1701437241-salat-iz-oduvanchikov.jpg)
Іншы наш чытач падчас падарожжа па Італіі спрабаваў марскога багамола.
– Набылі на рыбным рынку, у Італіі ўважаецца за далікатэс. Кілаграм каштаваў прыкладна 8 еўраў. У выніку еў яго толькі я. Спецыфічны смак, салодкая крэветка з смакам ёду, – успамінае чытач.
А яшчэ адзін гараджанін падчас паездкі ў пасёлак эскімосаў у Расеі каштаваў акутак – марожанае на аснове тлушчу аленя, цюленя або маржа з дадаваннем ягадаў.
– Нечым аддалена нагадвае наша марозіва фруктовы лёд з крамаў, – адзначыў ён.
Толькі некаторым гараджанам незвычайныя стравы давялося пакаштаваць у Беларусі.
– У нас прыватны дом. Мама вясной ці на пачатку лета зразала маладую крапіву, апарвала і варыла суп. Смачна атрымлівалася, як са шчаўя практычна, – падзялілася гараджанка Вольга.
У спісе незвычайных страваў, якія давялося дэгуставаць нашым чытачам, таксама галубцы з вінаграднага лісця. А яшчэ сочыва з дзьмухаўцоў, бурачнае бацвінне з грэцкімі арэхамі і агуркі з мёдам.