Дыктатар: У нас часу на разварушванне няма

Лукашэнка патрабуе надзяліць міністраў вялікімі паўнамоцтвамі.

Урад павінен быць калегіяльным органам, дзе галоўнае звяно - міністр, заявіў сёння Аляксандр Лукашэнка, прадстаўляючы дэпутатам новага прэм'ер-міністра Андрэя Кабякова на пасяджэнні шостай пазачарговай сесіі «палаты прадстаўнікоў».

«Найважнейшая задача прэм'ер-міністра - дакладная каардынацыя ўсёй працы. Прасцей кажучы, развесці міністраў і віцэ-прэм'ераў так, каб намеснік прэм'ер-міністра не мог дзейнічаць па-старому, калі даваліся вытворчыя ўказанні і міністр быў гэтым павязаны па руках і нагах, не мог дзейнічаць самастойна», - сказаў Лукашэнка, словы якога прыводзіць дзяржаўнае інфармагенцтва БелТА.

Лукашэнка адзначыў, што на ягонае даручэнне ва ўрадзе ўжо рыхтуюцца адпаведныя змены ў нарматыўна-прававую базу. «Таму патрабую ў бліжэйшыя тэрміны падаць гэтыя змены, калі гэта трэба. У нас часу на разварушванне няма», - падкрэсліў ён.

Паводле слоў Лукашэнкі, асноўная зона адказнасці міністраў у прамысловасці - стварэнне ўмоў для працы прамысловых прадпрыемстваў, у сельскай гаспадарцы - сельскагаспадарчых арганізацый, у адукацыі - школ, сярэдніх спецыяльных навучальных устаноў і ВНУ, у ахове здароўя - бальніц і гэтак далей. «Зоны адказнасці вызначаны. Трэба дзейнічаць», - сказаў ён.

Ён падкрэсліў, што пастановы міністра «павінны выконвацца неадкладна». «Любая пастанова, якую ён прыме, законная. Але і адказнасць за яе нясе ў першую чаргу міністр. Калі казаць коратка, то міністр не мае права, даючы справаздачу ў парламенце або дакладваючы прэзідэнту, сказаць, што ў яго не хапала паўнамоцтваў ці не хапала нейкай нарматыўна-прававой базы», - заявіў Лукашэнка.

Ён звярнуў увагу на тое, што нават у складаныя моманты, якія былі ў канцы 2014 года і ў пачатку 2015-га, пытанні коштаўтварэння былі ўзятыя пад кантроль пасля таго, як гэта было даручана Міністэрству гандлю.

«Было даручана Міністэрству гандлю і міністру ўзяць пад кантроль гэтыя пытанні, яны гэта зрабілі без шуму і без гвалту. Так павінна быць у прынцыпе. Мы гэта будзем кантраляваць самым жорсткім чынам», - сказаў Лукашэнка.

Ён таксама нагадаў, што кіраваць эканомікай павінны менавіта ўрад.