Мядзведзеў: З нафтай выявілася складаней, чым чакалі

Сітуацыя з цэнаўтварэннем нафты выявілася больш складанай, чым чакалі ўлады Расеі.

Пра гэта заявіў прэм'ер-міністр РФ Дзмітрый Мядзведзеў падчас выступу на гайдараўскім форуме, піша РІА «Новости».

«Сітуацыя, у якой знаходзіцца Расея, расейская эканоміка - яна, вядома, вельмі няпростая, але, скажам прама, яна была чаканая і была зразумелая ўжо год таму, нават больш», - сказаў Мядзведзеў, выступаючы ў сераду на гайдараўскім форуме. «Мы самі разумелі ў 2014 годзе, што ўсё так і будзе», - сказаў ён.

Пры гэтым ён прызнаў, што «з нафтай сталася крыху больш складана, чым мы [улады Расеі] чакалі, так часам бывае». Ад гэтага не лягчэй, прызнаў кіраўнік урада.

Прэм'ер РФ прывёў размову з экс-прэзідэнтам ЗША Джорджам Бушам-малодшым падчас глабальнага эканамічнага крызісу ў 2008 годзе. Тады на пытанне Мядзведзева, «што наогул адбываецца» з эканомікай ЗША, «здаецца, ніхто нічога амаль не чакаў, нават аналітыкі амаль усе памыляліся», Буш адказаў, што ўлады ЗША «залішне перадаверыліся Уол-стрыту», сказаў Мядзведзеў. Уладам Расеі на гэты раз «было зразумела, чаго чакаць», сказаў ён.

«І само па сабе гэта ўжо нядрэнна. У нас ёсць магчымасць рэагаваць на ўсё і прымаць верныя пастановы», - завяршыў прэм'ер. Падчас сённяшніх гадляванняў на біржы ICE кошт ф'ючэрсаў на пастаўку нафты маркі Brent у лютым 2015 зніжаўся да $45,59 за бар. Гэта прыкладна на 2% ніжэй за ўзровень закрыцця папярэдніх таргоў.