Адвакаты Баўмгертнера падалі скаргу ў Генпракуратуру

Адвакаты гендырэктара «Уралкалія» абскардзілі яго затрыманне.

Пра гэта паведаміў РІА «Навіны» адзін з абаронцаў расейскага бізнэсмэна Дзмітрый Гарачка.

«Скаргі пададзеныя і ў Генпракуратуру, і ў гарадскі суд», - паведаміў адвакат.

Абароне Уладзіслава Баўмгертнера пакуль невядома, калі яны будуць разгледжаныя.

Адвакат не ўдакладніў, як яго кліент адрэагаваў на нядаўнюю заяву Лукашэнкі аб тым, што той можа быць перададзены ў Расею. Гарачка растлумачыў, што яго «прасілі гэта не каментаваць».

Нагадаем, кіраўнік «Уралкалія» Уладзіслаў Баўмгертнер быў затрыманы ў Менскім аэрапорце 26 жніўня пасля сустрэчы з прэм'ер -міністрам Беларусі Міхаілам Мясніковічам. Следчы камітэт Беларусі прад'явіў яму абвінавачанне па частцы 3 артыкула 424 КК Беларусі (злоўжыванне ўладай і службовымі паўнамоцтвамі). Санкцыя гэтага артыкула прадугледжвае пакаранне ў выглядзе пазбаўлення волі на тэрмін да 10 гадоў з канфіскацыяй маёмасці. Пасля абрання меры стрымання ён змешчаны ў следчы ізалятар КДБ Беларусі.