Мікалаю Статкевічу - 57

Палітык знаходзіцца ў турме ўжо больш за два з паловай гады.

Жонка Мікалая Статкевіча Марына Адамовіч распавяла сайту charter97.org пра тое, як яны з мужам святкавалі яго дзень народзінаў раней, калі ён быў на волі.

«Мы заўсёды адзначалі гэтае свята ўдваіх. Часам - з яго сябрамі. Часта гэта адбывалася ў некалькі этапаў - удваіх і больш шырокім колам. Звычайна гэта збіраліся недзе ў горадзе, у кафэ або ў загарадных хатах нашых сяброў», - сказала яна.

Марына Адамовіч таксама распавяла пра тое, чым цяпер займаецца яе муж у турме і ў якіх умовах знаходзіцца.

«Акрамя стандартнага «ў мяне ўсё нармальна» ён нічога не распавядае ў лістах пра ўмовы ўтрымання. Ён звычайна ні на што не скардзіцца. Яго да гэтага часу не перавялі са следчага корпуса ў турэмны. У ліпені адбылося пасяджэнне камісіі, якая зняла з яго статус злоснага парушальніка. Таму цяпер ён мае права на «атаварку» не на 100 тысяч рублёў, як раней, а на 200. Гэта пакуль адзінае паляпшэнне.

Што тычыцца таго, чым ён займаецца ў турме, то гэта - спорт, чытанне кніг, вывучэнне англійскай мовы - наколькі гэта магчыма ў тых умовах, у якіх ён зараз знаходзіцца», - сказала яна.

Жонка палітвязня распавяла пра тое, як ёй удалося павіншаваць яго ў мінулым годзе.

«У яго ў камеры ёсць радыёкропка, якая ўключаецца ў пэўны час. Там ёсць перадачы, праз якія можна перадаць віншаванні. Аднак цяпер павіншаваць яго такім спосабам не атрымалася», - распавяла Марына Адамовіч. Яна дадала, што галоўным пажаданнем на дзень нараджэння мужа было пажаданне яго вызвалення.

Сайт charter97.org далучаецца да віншаванняў і жадае Мікалаю Статкевічу хутчэйшага выхаду на волю.

***

Мікалай Статкевіч нарадзіўся 12 жніўня 1956 года ў вёсцы Лядна Слуцкага раёна Менскай вобласці. Скончыў Менскае вышэйшае інжынернае зенітна-ракетнае вучылішча (МВІЗРВ) СПА. Абараніў кандыдацкую дысертацыю і выкладаў у МВІЗРВ. Кандыдат тэхнічных навук, падпалкоўнік запасу. 20 жніўня 1991 года публічна выступіў супраць путчу ў Маскве. Тады ж абвясціў пра стварэнне Беларускага згуртавання вайскоўцаў.

Мікалай Статкевіч быў адным з кандыдатаў у прэзідэнты на выбарах у 2010 годзе. Яго арыштавалі пасля масавай дэманстрацыі пратэсту супраць фальсіфікацый прэзідэнцкіх выбараў 19 снежня 2010 года. Тады былі арыштаваныя больш за 700 удзельнікаў акцыі пратэсту, у тым ліку кандыдаты ў прэзідэнты Андрэй Саннікаў, Уладзімір Някляеў, Алесь Міхалевіч і члены іх выбарчых штабоў.

26 траўня 2011 года палітык быў асуджаны судом Партызанскага раёна Менска да 6 гадоў пазбаўлення волі ва ўмовах узмоцненага рэжыму. У мінулым годзе ўмовы адбыцця пакарання былі змененыя на больш жорсткія. Яго перавялі з калоніі № 17 у Шклове ў турму № 4 Магілёва.

Адзін з апошніх лістоў палітыка з турмы быў канфіскаваны пракуратурай. Як стала вядома пазней, у ім палітык паведамляў пра тое, што палітычным зняволеным за кратамі пагражалі згвалтаваннем.