Еўрамайдан рыхтуецца прыняць мільён чалавек на Новы год

Украінцы сустрэнуць Новы год на вуліцах і плошчах.

У ноч на Новы год на Майдане Незалежнасці ўсіх удзельнікаў будуць частаваць безалкагольным шампанскім і цукеркамі, заявіў камендант Дома прафсаюзаў Міхаіл Блавацкі, піша Gazeta.ua.

На брыфінгу ў панядзелак ён выказаў надзею, што на Майдан прыйдзе такая колькасць людзей, якая дазволіць унесці гэта мерапрыемства ў Кнігу рэкордаў Гінеса - па яго ацэнцы, гэта можа быць да мільёна чалавек.

Таксама, паводле яго слоў, у навагоднюю ноч на Майдане запланаваная вялікая канцэртная праграма, у прыватнасці запрошаныя гурты Modern Talking, Pink Floyd. Таксама ў канцэрце возьмуць удзел украінскія выканаўцы. Плануецца таксама правядзенне розных гульняў, конкурсаў.

Акрамя таго, моладзевае крыло Майдана мае намер арганізаваць мерапрыемства «святочная паштоўка з Майдана».

З гэтай мэтай на Майдане будзе арганізаванае месца, дзе ўсе карыстальнікі сацыяльных сетак змогуць пазнаёміцца, а таксама сфатаграфавацца на фоне «дзядулі Майдана». Фатаграфія будзе адразу ж выстаўляцца на адмысловую старонку ў сацсетку «Фэйсбук».

Масавыя акцыі прыхільнікаў еўраінтэграцыі ў Кіеве і іншых рэгіёнах Украіны пачаліся 21 лістапада пасля абвяшчэння ўрадам аб прыпыненні падрыхтоўкі Пагаднення аб асацыяцыі з ЕЗ, якое планавалася аформіць на саміце «Усходняга партнёрства» ў Вільні. Улады краіны некалькі разоў спрабавалі спыніць іх сілавымі метадамі, зачысціўшы Майдан Незалежнасці ад намётаў і актывістаў апазіцыі. Тым не менш, людзі застаюцца ў цэнтры Кіева, а акцыі працягваюцца ўжо другі месяц.