У Катавіцах бегалі за Статкевіча і свабодную Беларусь

Прабег у падтрымку беларускага палітвязня адбыўся ў польскім горадзе Катавіцы.

Яго арганізатарамі выступілі еўрадэпутат Марэк Мігальскі і грамадская арганізацыя «Projekt Śląsk». Мерапрыемства пад лозунгам «За Статкевіча і свабодную Беларусь» адбылося ў мінулую нядзелю. Яго мэтай было распаўсюджванне інфармацыі аб беларускім палітвязні і сітуацыі ў нашай краіне, паведамляе сайт еўрадэпутата.

Многія ўдзельнікі прабегу былі апранутыя ў майкі з партрэтам Мікалая Статкевіча.      

«Апроч чыста спартыўнага спаборніцтва, прабег быў арганізаваны з мэтай павышэння ўзроўню інфармаванасці жыхароў аб становішчы грамадзянскай супольнасці ў Беларусі і беларускіх палітвязняў. Перш за ўсё, мы хацелі паказаць удзельнікам фігуру Мікалая Статкевіча, кандыдата ў прэзідэнты на выбарах 2010 года, які ў цяперашні час адбывае шэсць гадоў пазбаўлення волі ў турме закрытага тыпу ў Магілёве. Падчас мерапрыемства ў Катавіцах прысутнічала жонка палітвязня Марына Адамовіч, якая ахвотна мела зносіны з яго ўдзельнікамі і распавядала пра свайго мужа», - гаворыцца ў паведамленні.

Забег праходзіў у парку імя Тадэвуша Касцюшкі. Пяцікіламетровую дыстанцыю прабеглі 50 удзельнікаў. Пераможцамі сталі Лех Главяк, які адолеў яе за 17 хвілін 13 секунд, і Агнешка Глонб, якая прыйшла да фінішу за 20 хвілін 43 секунды.