Газпром выставіў рахунак Украіне

Нацыянальная акцыянерная кампанія (НАК) "Нафтагаз Украіны" атрымала ад "Газпрома" рахунак на $ 7 млрд.

Прычынай яго стала тое, што кампанія купіла ў мінулым годзе менш газу, чым прадугледжана дзейным кантрактам, паведаміў прадстаўнік украінскай стараны газэце Financial Times.

"Нафтагаз" наўрад аплаціць рахунак, што можа прымусіць "Газпром" (РТС: GAZP) перанесці разгляд у міжнародны арбітраж, мяркуе крыніца.

Брытанская газэта піша, што патрабаванне "Газпрома" выплаціць $ 7 млрд пагражае выклікаць трэці лікам маштабны канфлікт паміж Расеяй і Ўкраінай у газавай сферы.

У "Газпроме" інфармацыю брытанскай газэты ў суботу каментаваць не сталі, паведамляе "Інтэрфакс".

Украіна ў 2012 годзе паводле ацэнак купіла 33 млрд куб.м расейскага газу. Між тым, паводле дзейнага кантракту ад 19 студзеня 2009 года, "Нафтагаз" павінен быў закупіць 52 млрд куб.м газу, мінімальныя абавязанні (take-or-pay) складаюць 41,6 млрд куб.м.

"Нафтагаз" вёў перамовы з "Газпромам" аб зніжэнні мінімальнага абавязковага аб'ёму закупкі да 27 млрд куб.м газу ў год дзеля яго дарагоўлі, аднак стораны не прыйшлі да згоды.

Кантракт 2009 года не задавальняе ўкраінскую старану, якая пакуль безвынікова дамагаецца перагляду коштавых параметраў кантракту. У сувязі з гэтым украінскі дзяржхолдынг мае намер зніжаць закупкі расейскага энэргарэсурсу і з лістапада пачаў выкарыстанне сваіх газатранспартных магутнасцяў у рэвэрсным кірунку для закупак газу ў Еўропе.