Літва запатрабуе ад «Газпрама» кампенсацыі страт

Прэм'ер-міністр Андрус Кубілюс заявіў, што «Газпрам» павінен змяніць коштавую палітыку.

«Еўропа - адзін з найбуйнейшых спажыўцоў «Газпрама», і калі «Газпрам» не знойдзе спосабы, як разумна рэагаваць на пасыланы спажыўцамі прававы сігнал, гэта, на маю думку, будзе не вельмі разумна. Ад яго трэба адно - каб ён як мага хутчэй пачаў мяняць палітыку коштаў, і, магчыма, як і з іншымі краінамі, дамовіўся бы аб кампенсацыі хоць бы часткі страт, нанесеных з прычыны такой палітыкі коштаў», - сказаў у чацвер у інтэрв'ю Žinių radijаs прэм'ер -міністр Літвы, паведамляе ru.delfi.lt.

Ён не ўказаў памеры страт, пра якія шла гаворка.

«Я спадзяюся, што ў «Газпрама» хопіць здаровага розуму зразумець, што гэта спрэчка ўжо не з Літвой, не з прэм'ерам Кубілюсам і міністрам Сякмокасам, гэта спрэчка з усім Еўрапейскім Звязам, які лічыць важным абараніць адну са сваіх асноўных установак - ажыццяўленне так званага трэцяга пакета, лібералізацыю газавага рынку, таму гэтая спрэчка стане самай сур'ёзнай», - сказаў Андрус Кубілюс.

Паводле яго слоў, у Еўропе ўжо былі прэцэдэнты, калі прадпрыемствы за падобныя парушэнні павінны былі заплаціць вялікія штрафы.

«Усе памятаюць падобныя прэцэдэнты, калі Еўракамісія распачынала такія справы з-за парушэння праў канкурэнцыі буйным кампаніям - Microsoft і Intel, і гэта скончылася вялікімі штрафамі гэтым кампаніям. У рэшце рэшт, кампаніі павінны былі пагадзіцца з ЕЗ і дзейнічаць згодна з правіламі канкурэнцыі », - сказаў Кубілюс.

Афіцыйныя прэтэнзіі павінны быць разгледжаны за чатыры месяцы. Калі абвінавачванні пацвердзяцца, «Газпраму» пагражае вялікі штраф - да 10% гадавых даходаў. Даходы расейскага канцэрна ад продажу газу за мяжой у мінулым годзе склалі прыкладна 57 млрд. даляраў ЗША, і калі будзе прызначаны максімальны штраф, ён можа дасягаць 5,7 млрд. даляраў (прыкладна 15,7 млрд. літаў).

Звычайна такія расследаванні ў ЕЗ доўжацца вельмі доўга. Але гэта справа лічыцца прыярытэтнай, а гэта, як сцвярджаюць расейскія СМІ, дрэнны знак для «Газпрама».

Тым не менш, расейская кампанія зніжаць кошты для еўрапейскіх спажыўцоў не збіраецца. На мінулым тыдні Міністэрства эканамічнага развіцця Расеі і «Газпрам» прадставілі прагноз коштаў на газ для еўрапейскіх спажыўцоў: у 2013 г. - $361,6 за 1000 куб. метраў, у 2014 г. - $351,7, а ў 2015 г. - $366,1.

Літва за 1000 куб. метраў у жніўні гэтага года плаціла 1578 літаў - гэта самы высокі кошт у ЕЗ.