Святлана Калінкіна: Веру сваім вачам - «выбары» не адбыліся

На выбарчым участку, які наведала журналістка, быў толькі адзін выбаршчык.

«Я веру сваім вачам. Я сёння схадзіла на свой выбарчы ўчастак. Я не галасавала, але проста пайшла паглядзець, колькі там людзей. На выбарчым участку быў толькі адзін выбаршчык, які галасаваў. Другім выбаршчыкам была я», - сказала Святлана Калінкіна ў перадачы «Пражскі акцэнт» на «Радыё Свабода».

«Усе нашыя журналісты, якія сёння працавалі і былі на выбарчых участках, таксама сцвярджаюць, што людзей было вельмі-вельмі мала. Можна спрачацца, ці быў гэта вынік кампаніі байкоту «выбараў», якую праводзілі некаторыя апазіцыйныя сілы, ці гэта проста такая пазіцыя людзей, але мне здаецца, відавочна, што на выбарчых участках людзей было значна менш, чым заўсёды. І ў гэтым сэнсе гэта, так бы мовіць, рэферэндум, які паказаў, што ўлада перагнула палку, прымушаючы людзей не цікавіцца палітыкай і ўсяляк дэманструючы, што палітыка - гэта небяспечна для простага чалавека», - сказала журналістка.

Святлана Калінкіна лічыць, што людзі проста не цікавяцца, не вераць у тое, што «парламент» можа нешта вырашыць, што яны самі могуць нешта вырашыць, прагаласаваўшы. Людзі і ўлада становяцца ўсё далей адзін ад аднаго.

«На самой справе, тое, што адбылося (байкот «выбараў» у буйных гарадах, як мінімум), - што б ні стаяла за гэтым: адсутнасць цікавасці ў людзей да палітыкі, аўтарытэт апазіцыі або недавер да «парламента», - на мой погляд, усё гэта азначае, што ў грамадстве саспела патрабаванне вялікай палітычнай рэформы. Калі не канцэнтравацца толькі на «выбарах», а глядзець шырэй, - народ патрабуе палітычнай рэформы, выбаршчыкі яе чакаюць - мне здаецца, гэта можа стаць падставай для аб'яднання апазіцыі і для таго, каб мы з гэтай кампаніі зрабілі сапраўды сур'ёзныя высновы, высновы стратэгічныя, а не тактычныя», - сказала яна.