«Палатка» без апазіцыі

Новы «парламент» будзе такім жа кішэнным, як і папярэдні.

ЦВК апублікаваў спіс новага складу «палаты прадстаўнікоў». Як і чакалася, у ім няма ніводнага прадстаўніка апазіцыі.

Раней пра гэта ж заявіла старшыня Цэнтрвыбаркама Лідзія Ярмошына.

Назіральнікі і апазіцыйныя палітыкі гавораць аб масавых парушэннях заканадаўства пры падрыхтоўцы і правядзенні «выбараў».

Падчас агітацыйнай кампаніі ўлады падвяргалі цэнзуры выступленні кандыдатаў ад апазіцыі па радыё і тэлебачанні. Многія з іх былі проста зняты з эфіру. У альтэрнатыўных кандыдатаў канфіскоўвалі друкаваную прадукцыю і не давалі магчымасць вырабляць яе.

Найбольшыя парушэнні зафіксаваныя пасля пачатку датэрміновага галасавання. Практычна з усіх буйных ВНУ і прадпрыемстваў паступіла інфармацыя аб тым, што людзей прымушаюць у ім удзельнічаць пад пагрозамі. Датэрмінова галасавалі іншагароднія студэнты, жыхары інтэрнатаў, ваеннаслужачыя, супрацоўнікі дзяржаўных прадпрыемстваў, грамадзяне, асуджаныя да абмежавання волі.

Між тым, як паказвае практыка папярэдніх «выбарчых кампаній», вынікі датэрміновага галасавання рэзка адрозніваюцца ад дадзеных асноўнага дня «выбараў». Назіральнікі зафіксавалі факты вольнага доступу да скрыняў для галасавання. Яны паведамлялі і пра ўкідванне бюлетэняў. Дадзеныя аб тых, хто прагаласаваў датэрмінова ў ЦВК і незалежных назіральнікаў таксама сур'ёзна адрозніваюцца.

Натуральна, не абышлося без парушэнняў і ў дзень галасавання. Упершыню ў гісторыі беларускіх «выбараў» зафіксавана выкарыстанне «каруселяў», калі адных і тых жа выбаршчыкаў арганізавана вазілі галасаваць па розных участках. У канцы дня яўка практычна на ўсіх участках масава ўзрастала. Як і варта было чакаць, у момант падліку галасоў назіральнікі практычна не маглі сачыць за ім, многіх выдалялі з участкаў па надуманых прычынах.

Апазіцыйныя партыі ўжо заявілі аб тым, што не будуць прызнаваць «выбары». Яўка выбаршчыкаў была завышаная ў разы. На думку незалежных назіральнікаў, «выбары» не адбыліся ў многіх акругах.