Польскія хуліганы збілі беларусаў (Фота)

12.08.2012, 15:29

У судырэктара Беларускага дома зламаны нос, у фотакарэспандэнта charter97.org - разбіта галава і зламаны палец.

12 жніўня ў Варшаве павінен быў адбыцца футбольны турнір на кубак Беларускага дома з удзелам каманд тэлеканала «Белсат», «Еўрарадыё», «Еўрапейскай Беларусі» і Беларускага інфармацыйнага дома.

У 12 гадзін на стадыёне гімназіі № 23 на вуліцы Тарнавецкай у адпаведнасці з афіцыйным дазволам кіраўніцтва навучальнай установы павінен быў пачацца матч. Аднак у гэты час стадыён быў заняты - дзве каманды мясцовых жыхароў гулялі ў футбол. Нягледзячы на настойлівыя просьбы кіраўніцтва гімназіі, яны адмаўляліся пакінуць поле. Пры гэтым палякі сталі пагражаць беларускім гульцам і заўзятарам, сярод якіх былі жанчыны і дзеці.

Гульцы «Белсата», «Еўрарадыё», «Еўрапейскай Беларусі» і Беларускага інфармацыйнага дома чакалі каля паўгадзіны, потым заўзятары сталі развешваць на агароджы стадыёна бел-чырвона-белыя сцягі, спадзеючыся, што вось-вось пачнецца матч на кубак Беларускага дома.

Аднак, убачыўшы беларускія сцягі, палякі сталі іх зрываць з агароджы. Пры гэтым у адрас беларусаў, многія з якіх прыйшлі з дзецьмі, было шмат дзяўчат і жанчын, сыпаліся брудныя абразы і пагрозы тыпу «зараз пад'едуць нашы сябры з бітамі і мы вас заб'ем».

Потым хуліганы перайшлі да дзеянняў - павалілі на зямлю і пачалі збіваць нагамі арганізатара турніру, судырэктара Беларускага дома Зміцера Бародку, які прыйшоў на матч з двума маленькімі сынамі. Фотажурналіст charter97.org Іван Межуй спрабаваў здымаць напад на фотаапарат. У выніку яго таксама збілі, паваліўшы на зямлю, а затым забралі фотакамеру.

На месца здарэння прыехала паліцыя, але хуліганы ўжо схаваліся. Зміцера Бародку і Івана Межуя павезлі на машыне хуткай дапамогі ў шпіталь. У дырэктара Беларускага дома зламаны нос, у журналіста - разбіта галава, яму наклалі швы, а таксама зламаны палец.