Сяргея Каваленку пасадзілі ў адзіночную камеру

Сяргей Каваленка знаходзіцца ў адзіночнай камеры віцебскага следчага ізалятара № 2.

Пра гэта паведаміла БелаПАН ягоная жонка Алена Каваленка.

«Сяргея даставілі з Менска ўначы з 7 на 8 мая. Сёння з ім сустракаўся адвакат. Самаадчуванне мужа не лепшае. Для яго гэта быў ужо чацвёрты этап - фактычна здзек для саслабленага галадоўкай чалавека. 10 мая паспрабую прабіцца да яго сама», - сказала Алена Каваленка.

У гэтым СІЗА актывіст знаходзіўся першыя два месяцы зняволення, і таксама практычна ўвесь час у адзіночнай камеры, адзначыла жонка. «Мяне непакоіць, што яго этапавалі туды, дзе ён галадаў першыя два месяцы зняволення і дзе ў яго дачыненні да ажыццяўляліся правакацыі, у тым ліку здымаўся відэаролік, які закранае не толькі Сяргея, але і ягоных дзяцей. З гэтай нагоды была перададзеная заява ў пракуратуру», - паведаміла Каваленка.