КДБ зноў пагражае Міхалевічу

КДБ пагражае кандыдату ў прэзідэнты крымінальнай адказнасцю за артыкул «Тэхналогіі катаванняў».

У сваёй публікацыі палітык распавёў пра тое, што некалі былы супрацоўнік КДБ, які атрымаў палітычны прытулак у адной з краін ЕЗ, падарыў яму метадычку, па якой яго вучылі ў беларускім Інстытуце нацыянальнай бяспекі, піша БелаПАН.

У гэтай кнізе, па словах Міхалевіча, ёсць раздзел «Метады мэтанакіраванага ўздзеяння на чалавека». «Апошняе месца па парадку, але відавочна не па важнасці ў ім займаюць катаванні», - адзначае ён.

Якія гэта катаванні, і распавёў у артыкуле экс-кандыдат у прэзідэнты.

Дадзеную інфармацыю начальнік цэнтра інфармацыі і грамадскіх сувязяў КДБ Аляксандр Антановіч назваў «абсалютнай выдумкай і трызненнем». Прадстаўнік КДБ адзначыў, што яна можа расцэньвацца як паклёпніцкія выдумкі, якія наносяць шкоду ведамству.

«У сувязі з гэтым хлусня і паклёп будуць разглядацца праз прызму прававой адзнакі дзеянняў па распаўсюджванні інфармацыі, якая наносіць шкоду дзелавой рэпутацыі КДБ», - заявіў Антановіч.